Texts

prapadanasyāvṛtā prapadya vedyākramaṇena vedim ākrāmati mṛdā śithirā devānāṃ vedir asi namas te astu mā mā hiṃsīr iti // (1) Par.?

ādityam upatiṣṭhate 'dhvanām adhvapate svasti me 'smin devayāne pathi kṛṇu raudreṇānīkena svasty agne paridehīti // (2) Par.?

dhiṣṇyān upatiṣṭhate // (3) Par.?

samrāḍ asi kṛśānū raudreṇānīkena pāhi māgne pipṛhi mā namas te astu mā mā hiṃsīr ity āhavanīyam // (4) Par.?

tutho 'si janadhā iti bāhiṣpavamānīyam āstāvam // (5) Par.?

nabho 'si pratakvā iti cātvālam // (6) Par.?

asaṃmṛṣṭo 'si havyasūdana iti śāmitram // (7) Par.?

kṛṣṇo 'sy ākhareṣṭha ity utkaram // (8) Par.?

aindrīm āvṛtam anvāvarta iti dakṣiṇaṃ bāhum anu paryāvṛtyottareṇāgnīdhraṃ parītya paścāt prāgāvṛttas tiṣṭhan vibhūr asi pravāhaṇa ity āgnīdhram upatiṣṭhate // (9) Par.?

purastāt sadasaḥ pratyagāvṛttas tiṣṭhan vahnir asi havyavāhana iti hotur dhiṣṇyam // (10) Par.?

śvātro 'si pracetā iti maitrāvaruṇasya // (11) Par.?

tutho 'si viśvavedā iti brāhmaṇācchaṃsinaḥ // (12) Par.?

uśig asi kavir iti potuḥ // (13) Par.?

aṃghārir asi bambhārir iti neṣṭuḥ // (14) Par.?

avasyur asi duvasvān ity acchāvākasya // (15) Par.?

śundhyur asi mārjālīya iti mārjālīyam // (16) Par.?

amṛtadhāmāsi svarjyotir ity audumbarīm // (17) Par.?

pariṣadyo 'sy āstāva ity āstāvam // (18) Par.?

samudro 'sy uruvyacā iti brahmasadanam // (19) Par.?

samudro 'si viśvavyacā iti hotṛṣadanam // (20) Par.?

uttareṇa sadaḥ parītya paścāt pratyagāvṛttas tiṣṭhann ajo 'sy ekapāt iti gārhapatyam upatiṣṭhate // (21) Par.?

ahir asi budhnya iti prājahitam // (22) Par.?

sagaro 'si budhnya itītaraṃ prājahitam // (23) Par.?

kavyo 'si kavyavāhana iti dakṣiṇaṃ vedyantam // (24) Par.?

savyam aṃsam anu paryāvṛtya samastān dhiṣṇyān upatiṣṭhate 'gnayaḥ sagarāḥ sagarair nāmabhī raudrair anīkaiḥ pāta māgnayaḥ pipṛta mā / (25.1) Par.?

namo vo astu mā mā hiṃsiṣṭeti // (25.2) Par.?

sadaso dvārau samīkṣata ṛtasya dvārau vijihāthāṃ mā mā saṃtāptaṃ lokaṃ me lokakṛtau kṛtam iti // (26) Par.?

sadasaspatim adbhutaṃ priyam indrasya kāmyaṃ saniṃ medhām ayāsiṣam ity etayarcā sadaḥ prapadya dakṣiṇenaudumbarīṃ parītyottarata upaveśanasyāvṛtopaviśanti udagāvṛtta udgātā purastāt prastotā pratyaṅmukhaḥ paścāt pratihartā dakṣiṇāmukhaḥ // (27) Par.?