Texts

Help

Select a text:
Bibliography
Select a chapter:
 1 revision
Associated topic(s): Soma sacrifice

Show parallels  Show headlines
Use dependency labeler
Chapter id: 15883
  • Click on a sentence to show its analysis
  • Keep the mouse pointer over a lemma to show its meanings.
devā vai yad yajñe 'kurvata tad asurā akurvata // (1) Par.?
te devā adābhye chandāṃsi savanāni samasthāpayan // (2) Par.?
tato devā abhavan parāsurāḥ // (3) Par.?
yasyaivaṃ viduṣo 'dābhyo gṛhyate bhavaty ātmanā parāsya bhrātṛvyo bhavati // (4) Par.?
yad vai devā asurān adābhyenādabhnuvan tad adābhyasyādābhyatvam // (5) Par.?
ya evaṃ veda dabhnoty eva bhrātṛvyaṃ nainam bhrātṛvyo dabhnoti // (6) Par.?
eṣā vai prajāpater atimokṣiṇī nāma tanūr yad adābhyaḥ // (7) Par.?
upanaddhasya gṛhṇāty atimuktyai // (8) Par.?
ati pāpmānam bhrātṛvyam mucyate ya evaṃ veda // (9) Par.?
ghnanti vā etat somaṃ yad abhiṣuṇvanti // (10) Par.?
some hanyamāne yajño hanyate yajñe yajamānaḥ // (11) Par.?
brahmavādino vadanti kiṃ tad yajñe yajamānaḥ kurute yena jīvant suvargaṃ lokam etīti // (12) Par.?
jīvagraho vā eṣa yad adābhyaḥ // (13) Par.?
anabhiṣutasya gṛhṇāti // (14) Par.?
jīvantam evainaṃ suvargaṃ lokaṃ gamayati // (15) Par.?
vi vā etad yajñaṃ chindanti yad adābhye saṃsthāpayanti // (16) Par.?
aṃśūn apisṛjati yajñasya saṃtatyai // (17) Par.?
Duration=0.067663192749023 secs.