Texts

yad aparaṃ kāraṇam uktam uccaritapradhvasta iti // (1) Par.?

atrāpi yadi śakṣyāmo nityatām asya vispaṣṭaṃ vaktuṃ tato nityapratyayasāmarthyāt kadācid upalambhaṃ kadācid anupalambhaṃ dṛṣṭvā kiṃcid upalambhasya nimittaṃ kalpayiṣyāmaḥ // (2) Par.?

tac ca saṃyogavibhāgasadbhāve sati bhavatīti saṃyogavibhāgāv evābhivyañjakāv iti vakṣyāmaḥ // (3) Par.?

uparatayoḥ saṃyogavibhāgayoḥ śrūyata iti cet // (4) Par.?

naitad evam // (5) Par.?

na nūnam uparamanti saṃyogavibhāgā yata upalabhyate śabda iti // (6) Par.?

na hi te pratyakṣā iti // (7) Par.?

yadi śabdaṃ saṃyogavibhāgā evābhivyañjanti na kurvanty ākāśaviṣayatvāc chabdasyākāśasyaikatvād ya evāyam atra śrotrākāśaḥ sa eva deśāntareṣv apīti śrughnasthaiḥ saṃyogavibhāgair abhivyaktaḥ pāṭaliputre 'py upalabhyeta // (8) Par.?

yasya punaḥ kurvanti tasya vāyavīyāḥ saṃyogavibhāgā vāyvāśritatvād vāyuṣv eva kariṣyanti yathā tantavas tantuṣv eva paṭam // (9) Par.?

tasya pāṭaliputreṣv anupalambho yuktaḥ śrughnasthatvāt teṣām // (10) Par.?

yasyāpy abhivyañjanti tasyāpy eṣa na doṣo dūre satyāḥ karṇaśaṣkulyā anupakārakāḥ saṃyogavibhāgās tena dūre yac chrotraṃ tena nopalabhyata iti // (11) Par.?

naitad evam // (12) Par.?

aprāptāś cet saṃyogavibhāgāḥ śrotrasyopakuryuḥ // (13) Par.?

saṃnikṛṣṭavikṛṣṭadeśasthau yugapac chabdam upalabheyātām // (14) Par.?

na ca yugapad upalabhete // (15) Par.?

tasmān nāprāptā upakurvanti // (16) Par.?

na ced upakurvanti tasmād animittaṃ śabdopalambhane saṃyogavibhāgāv iti // (17) Par.?

naitad evam // (18) Par.?

abhighātena hi preritā vāyavas timitāni vāyvantarāṇi pratibādhamānāḥ sarvatodikkān saṃyogavibhāgān utpādayanti // (19) Par.?

yāvadvegam abhipratiṣṭhante // (20) Par.?

te ca vāyor apratyakṣatvāt saṃyogavibhāgā nopalabhyante // (21) Par.?

anuparateṣv eva teṣu śabda upalabhyate noparateṣu // (22) Par.?

ato na doṣaḥ // (23) Par.?

ata eva cānuvātaṃ dūrād upalabhyate śabdaḥ // (24) Par.?