Texts

evaṃ tāvat kṛtsnasya vedasya prāmāṇyam uktam // (1) Par.?

athedānīṃ yatra na vaidikaṃ śabdam upalabhemahy atha ca smaranty evam ayam artho 'nuṣṭhātavya etasmai ca prayojanāyeti // (2) Par.?

kim asau tathaiva syān na veti // (3) Par.?

yathāṣṭakāḥ kartavyā gurur anugantavyas taḍāgaṃ khanitavyaṃ prapā pravartayitavyā śikhākarma kartavyam ityevamādayaḥ // (4) Par.?

tad ucyate dharmasya śabdamūlatvād aśabdam anapekṣaṃ syād iti // (5) Par.?

śabdalakṣaṇo dharma ity uktaṃ codanālakṣaṇo 'rtho dharma iti // (6) Par.?

ato nirmūlatvān nāpekṣitavyam iti // (7) Par.?

nanu ye vidur ittham asau padārthaḥ kartavya iti katham iva te vadiṣyanty akartavya evāyam iti // (8) Par.?

smaraṇānupapattyā na hy ananubhūto 'śruto vārthaḥ smaryate // (9) Par.?

na cāsyāvaidikasyālaukikasya ca smaraṇam upapadyate pūrvavijñānakāraṇābhāvād iti // (10) Par.?

yā hi bandhyā smaretedaṃ me dauhitrakṛtam iti na me duhitāstīti matvā na jātucid asau pratīyāt samyag etaj jñānam iti // (11) Par.?

evam api yathaiva pāramparyeṇāvicchedād ayaṃ veda iti pramāṇam eṣāṃ smṛtir evam iyam api pramāṇaṃ bhaviṣyatīti // (12) Par.?

naitad evam // (13) Par.?

pratyakṣeṇopalabdhatvād granthasya nānupapannaṃ pūrvavijñānam // (14) Par.?

aṣṭakādiṣu tv adṛṣṭārtheṣu pūrvavijñānakāraṇābhāvād vyāmohasmṛtir eva gamyate // (15) Par.?

tad yathā kaścij jātyandho vadet smarāmy aham asya rūpaviśeṣasyeti // (16) Par.?

kutas te pūrvavijñānam iti ca paryanuyukto jātyandham evāparaṃ vinirdiśet // (17) Par.?

tasya kuto jātyandhāntarāt // (18) Par.?

evaṃ jātyandhaparamparāyām api satyāṃ naiva jātucit sampratīyur vidvāṃsaḥ samyagdarśanam etad iti // (19) Par.?

ato nādartavyam evaṃjātīyakam anapekṣaṃ syād iti // (20) Par.?