Texts

atha yad aindrābārhaspatyaṃ brāhmaṇācchaṃsina ukthaṃ bhavatīndraś ca somaṃ pibataṃ bṛhaspate 'smin yajñe mandasānā vṛṣaṇvasū ity ṛcābhyanūktam // (1) Par.?

madvaddhi tṛtīyasavanam // (2) Par.?

vayam u tvām apūrvya yo na idamidaṃ pureti brāhmaṇācchaṃsina stotriyānurūpau // (3) Par.?

pra maṃhiṣṭhāya bṛhate bṛhadraya ity ukthamukham // (4) Par.?

aindrājāgatam // (5) Par.?

jāgatāḥ paśavaḥ // (6) Par.?

paśūnām āptyai // (7) Par.?

jāgatam u vai tṛtīyasavanam // (8) Par.?

tṛtīyasavanasya rūpam // (9) Par.?

udapruto na vayo rakṣamāṇā iti bārhaspatyaṃ sāṃśaṃsikam // (10) Par.?

ahaṃ ceti bṛhaspatir abravīt // (11) Par.?

devatayoḥ saṃśaṃsāyānatiśaṃsāya // (12) Par.?

acchā ma indraṃ matayaḥ svarvida iti paryāsa aindrābārhaspatyaḥ // (13) Par.?

aindrābārhaspatyam asyaitan nityam uktham // (14) Par.?

tad etat svasminn āyatane svasyāṃ pratiṣṭhāyāṃ pratiṣṭhāpayati // (15) Par.?

dvandvaṃ vā etā devatā bhūtvā vyajayanta // (16) Par.?

vijityā eva // (17) Par.?

atho dvandvasyaiva mithunasya prajātyai // (18) Par.?

bṛhaspatir naḥ pari pātu paścād ity aindrābārhaspatyā paridadhāti // (19) Par.?

indrābṛhaspatyor eva yajñaṃ pratiṣṭhāpayati // (20) Par.?

utottarasmād adharād aghāyor indraḥ purastād uta madhyato naḥ sakhā sakhibhyo varivaḥ kṛṇotv iti // (21) Par.?

sarvābhya eva digbhya āśiṣam āśāste nārtvī // (22) Par.?

yaṃ kāmaṃ kāmayate so 'smai kāmaḥ samṛdhyate ya evaṃ veda yaś caivaṃ vidvān brāhmaṇācchaṃsy etayā paridadhāti // (23) Par.?

bṛhaspate yuvam indraś ca vasva iti yajati // (24) Par.?

ete eva tad devate yathābhāgaṃ prīṇāti // (25) Par.?

vaṣaṭkṛtyānuvaṣaṭkaroti // (26) Par.?

praty evābhimṛśante // (27) Par.?

nāpyāyayanti // (28) Par.?

na hy anārāśaṃsāḥ sīdanti // (29) Par.?