Texts

devāsurāḥ saṃyattā āsan // (1) Par.?

te na vyajayanta // (2) Par.?

sa etā indras tanūr apaśyat // (3) Par.?

tā upādhatta // (4) Par.?

tābhir vai sa tanuvam indriyaṃ vīryam ātmann adhatta // (5) Par.?

tato devā abhavan parāsurāḥ // (6) Par.?

yad indratanūr upadadhāti tanuvam eva tābhir indriyaṃ vīryaṃ yajamāna ātman dhatte // (7) Par.?

atho sendram evāgniṃ satanuṃ cinute // (8) Par.?

bhavaty ātmanā // (9) Par.?

parāsya bhrātṛvyo bhavati // (10) Par.?

yajño devebhyo 'pākrāmat // (11) Par.?

tam avarudhaṃ nāśaknuvan // (12) Par.?

ta etā yajñatanūr apaśyan // (13) Par.?

tā upādadhata // (14) Par.?

tābhir vai te yajñam avārundhata // (15) Par.?

yad yajñatanūr upadadhāti yajñam eva tābhir yajamāno 'varunddhe // (16) Par.?

trayastriṃśatam upadadhāti // (17) Par.?

trayastriṃśad vai devatāḥ // (18) Par.?

devatā evāvarunddhe // (19) Par.?

atho sātmānam evāgniṃ satanuṃ cinute // (20) Par.?

sātmāmuṣmiṃ loke bhavati ya evaṃ veda // (21) Par.?

jyotiṣmatīr upadadhāti // (22) Par.?

jyotir evāsmin dadhāti // (23) Par.?

etābhir vā agniś cito jvalati // (24) Par.?

tābhir evainaṃ saminddhe // (25) Par.?

ubhayor asmai lokayor jyotir bhavati // (26) Par.?

nakṣatreṣṭakā upadadhāti // (27) Par.?

etāni vai divo jyotīṃṣi // (28) Par.?

tāny evāvarunddhe // (29) Par.?

sukṛtāṃ vā etāni jyotīṃṣi yan nakṣatrāṇi // (30) Par.?

tāny evāpnoti // (31) Par.?

atho anūkāśam evaitāni jyotīṃṣi kurute suvargasya lokasyānukhyātyai // (32) Par.?

yat saṃspṛṣṭā upadadhyād vṛṣṭyai lokam apidadhyād avarṣukaḥ parjanyaḥ syāt // (33) Par.?

asaṃspṛṣṭā upadadhāti // (34) Par.?

vṛṣṭyā eva lokaṃ karoti // (35) Par.?

varṣukaḥ parjanyo bhavati // (36) Par.?

purastād anyāḥ pratīcīr upadadhāti paścād anyāḥ prācīḥ // (37) Par.?

tasmāt prācīnāni ca pratīcīnāni ca nakṣatrāṇy āvartante // (38) Par.?