Texts

evam uktas tu sugrīvo rāmeṇārtena vānaraḥ / (1.1) Par.?

abravīt prāñjalir vākyaṃ sabāṣpaṃ bāṣpagadgadaḥ // (1.2) Par.?

na jāne nilayaṃ tasya sarvathā pāparakṣasaḥ / (2.1) Par.?

sāmarthyaṃ vikramaṃ vāpi dauṣkuleyasya vā kulam // (2.2) Par.?

satyaṃ tu pratijānāmi tyaja śokam ariṃdama / (3.1) Par.?

kariṣyāmi tathā yatnaṃ yathā prāpsyasi maithilīm // (3.2) Par.?

rāvaṇaṃ sagaṇaṃ hatvā paritoṣyātmapauruṣam / (4.1) Par.?

tathāsmi kartā nacirād yathā prīto bhaviṣyasi // (4.2) Par.?

alaṃ vaiklavyam ālambya dhairyam ātmagataṃ smara / (5.1) Par.?

tvadvidhānāṃ na sadṛśam īdṛśaṃ buddhilāghavam // (5.2) Par.?

mayāpi vyasanaṃ prāptaṃ bhāryāharaṇajaṃ mahat / (6.1) Par.?

na cāham evaṃ śocāmi na ca dhairyaṃ parityaje // (6.2) Par.?

nāhaṃ tām anuśocāmi prākṛto vānaro 'pi san / (7.1) Par.?

mahātmā ca vinītaś ca kiṃ punar dhṛtimān bhavān // (7.2) Par.?

bāṣpam āpatitaṃ dhairyān nigrahītuṃ tvam arhasi / (8.1) Par.?

maryādāṃ sattvayuktānāṃ dhṛtiṃ notsraṣṭum arhasi // (8.2) Par.?

vyasane vārthakṛcchre vā bhaye vā jīvitāntage / (9.1) Par.?

vimṛśan vai svayā buddhyā dhṛtimān nāvasīdati // (9.2) Par.?

bāliśas tu naro nityaṃ vaiklavyaṃ yo 'nuvartate / (10.1) Par.?

sa majjaty avaśaḥ śoke bhārākrānteva naur jale // (10.2) Par.?

eṣo 'ñjalir mayā baddhaḥ praṇayāt tvāṃ prasādaye / (11.1) Par.?

pauruṣaṃ śraya śokasya nāntaraṃ dātum arhasi // (11.2) Par.?

ye śokam anuvartante na teṣāṃ vidyate sukham / (12.1) Par.?

tejaś ca kṣīyate teṣāṃ na tvaṃ śocitum arhasi // (12.2) Par.?

hitaṃ vayasyabhāvena brūhi nopadiśāmi te / (13.1) Par.?

vayasyatāṃ pūjayan me na tvaṃ śocitum arhasi // (13.2) Par.?

madhuraṃ sāntvitas tena sugrīveṇa sa rāghavaḥ / (14.1) Par.?

mukham aśrupariklinnaṃ vastrāntena pramārjayat // (14.2) Par.?

prakṛtiṣṭhas tu kākutsthaḥ sugrīvavacanāt prabhuḥ / (15.1) Par.?

sampariṣvajya sugrīvam idaṃ vacanam abravīt // (15.2) Par.?

kartavyaṃ yad vayasyena snigdhena ca hitena ca / (16.1) Par.?

anurūpaṃ ca yuktaṃ ca kṛtaṃ sugrīva tat tvayā // (16.2) Par.?

eṣa ca prakṛtiṣṭho 'ham anunītas tvayā sakhe / (17.1) Par.?

durlabho hīdṛśo bandhur asmin kāle viśeṣataḥ // (17.2) Par.?

kiṃ tu yatnas tvayā kāryo maithilyāḥ parimārgaṇe / (18.1) Par.?

rākṣasasya ca raudrasya rāvaṇasya durātmanaḥ // (18.2) Par.?

mayā ca yad anuṣṭheyaṃ viśrabdhena tad ucyatām / (19.1) Par.?

varṣāsv iva ca sukṣetre sarvaṃ saṃpadyate tava // (19.2) Par.?

mayā ca yad idaṃ vākyam abhimānāt samīritam / (20.1) Par.?

tat tvayā hariśārdūla tattvam ity upadhāryatām // (20.2) Par.?

anṛtaṃ noktapūrvaṃ me na ca vakṣye kadācana / (21.1) Par.?

etat te pratijānāmi satyenaiva śapāmi te // (21.2) Par.?

tataḥ prahṛṣṭaḥ sugrīvo vānaraiḥ sacivaiḥ saha / (22.1) Par.?

rāghavasya vacaḥ śrutvā pratijñātaṃ viśeṣataḥ // (22.2) Par.?

mahānubhāvasya vaco niśamya harir narāṇām ṛṣabhasya tasya / (23.1) Par.?

kṛtaṃ sa mene harivīramukhyas tadā svakāryaṃ hṛdayena vidvān // (23.2) Par.?