Texts

vīkṣamāṇastato laṅkāṃ kapiḥ kṛtamanorathaḥ / (1.1) Par.?

vardhamānasamutsāhaḥ kāryaśeṣam acintayat // (1.2) Par.?

kiṃ nu khalvavaśiṣṭaṃ me kartavyam iha sāmpratam / (2.1) Par.?

yad eṣāṃ rakṣasāṃ bhūyaḥ saṃtāpajananaṃ bhavet // (2.2) Par.?

vanaṃ tāvat pramathitaṃ prakṛṣṭā rākṣasā hatāḥ / (3.1) Par.?

balaikadeśaḥ kṣapitaḥ śeṣaṃ durgavināśanam // (3.2) Par.?

durge vināśite karma bhavet sukhapariśramam / (4.1) Par.?

alpayatnena kārye 'sminmama syāt saphalaḥ śramaḥ // (4.2) Par.?

yo hyayaṃ mama lāṅgūle dīpyate havyavāhanaḥ / (5.1) Par.?

asya saṃtarpaṇaṃ nyāyyaṃ kartum ebhir gṛhottamaiḥ // (5.2) Par.?

tataḥ pradīptalāṅgūlaḥ savidyud iva toyadaḥ / (6.1) Par.?

bhavanāgreṣu laṅkāyā vicacāra mahākapiḥ // (6.2) Par.?

mumoca hanumān agniṃ kālānalaśikhopamam // (7.1) Par.?

śvasanena ca saṃyogād ativego mahābalaḥ / (8.1) Par.?

kālāgnir iva jajvāla prāvardhata hutāśanaḥ // (8.2) Par.?

pradīptam agniṃ pavanasteṣu veśmasu cārayat // (9.1) Par.?

tāni kāñcanajālāni muktāmaṇimayāni ca / (10.1) Par.?

bhavanānyavaśīryanta ratnavanti mahānti ca // (10.2) Par.?

tāni bhagnavimānāni nipetur vasudhātale / (11.1) Par.?

bhavanānīva siddhānām ambarāt puṇyasaṃkṣaye // (11.2) Par.?

vajravidrumavaidūryamuktārajatasaṃhitān / (12.1) Par.?

vicitrān bhavanād dhātūn syandamānān dadarśa saḥ // (12.2) Par.?

nāgnistṛpyati kāṣṭhānāṃ tṛṇānāṃ ca yathā tathā / (13.1) Par.?

hanūmān rākṣasendrāṇāṃ vadhe kiṃcin na tṛpyati // (13.2) Par.?

hutāśanajvālasamāvṛtā sā hatapravīrā parivṛttayodhā / (14.1) Par.?

hanūmataḥ krodhabalābhibhūtā babhūva śāpopahateva laṅkā // (14.2) Par.?

sasaṃbhramaṃ trastaviṣaṇṇarākṣasāṃ samujjvalajjvālahutāśanāṅkitām / (15.1) Par.?

dadarśa laṅkāṃ hanumānmahāmanāḥ svayambhukopopahatām ivāvanim // (15.2) Par.?

sa rākṣasāṃstān subahūṃśca hatvā vanaṃ ca bhaṅktvā bahupādapaṃ tat / (16.1) Par.?

visṛjya rakṣobhavaneṣu cāgniṃ jagāma rāmaṃ manasā mahātmā // (16.2) Par.?

laṅkāṃ samastāṃ saṃdīpya lāṅgūlāgniṃ mahākapiḥ / (17.1) Par.?

nirvāpayāmāsa tadā samudre harisattamaḥ // (17.2) Par.?