Texts

agnir uvāca / (1.1) Par.?

rāmāyaṇamahaṃ vakṣye nāradenoditaṃ purā / (1.2) Par.?

vālmīkaye yathā tadvat paṭhitaṃ bhuktimuktidam // (1.3) Par.?

nārada uvāca / (2.1) Par.?

viṣṇunābhyabjajo brahmā marīcirbrahmaṇaḥ sutaḥ / (2.2) Par.?

marīceḥ kaśyapastasmāt sūryo vaivasvato manuḥ // (2.3) Par.?

tatastasmāttathekṣvākus tasya vaṃśe kakutsthakaḥ / (3.1) Par.?

kakutsthasya raghustasmād ajo daśarathastataḥ // (3.2) Par.?

rāvaṇāder vadhārthāya caturdhābhūt svayaṃ hariḥ / (4.1) Par.?

rājño daśarathādrāmaḥ kauśalyāyāṃ babhūva ha // (4.2) Par.?

kaikeyyāṃ bharataḥ putraḥ sumitrāyāṃ ca lakṣmaṇaḥ / (5.1) Par.?

śatrughna ṛṣyaśṛṅgeṇa tāsu saṃdattapāyasāt // (5.2) Par.?

prāśitādyajñasaṃsiddhād rāmādyāś ca samāḥ pituḥ / (6.1) Par.?

yajñavighnavināśāya viśvāmitrārthito nṛpaḥ // (6.2) Par.?

rāmaṃ saṃpreṣayāmāsa lakṣmaṇaṃ muninā saha / (7.1) Par.?

rāmo gato 'straśastrāṇi śikṣitastāḍakāntakṛt // (7.2) Par.?

mārīcaṃ mānavāstreṇa mohitaṃ dūrato 'nayat / (8.1) Par.?

subāhuṃ yajñahantāraṃ sabalaṃ cāvadhīt balī // (8.2) Par.?

siddhāśramanivāsī ca viśvāmitrādibhiḥ saha / (9.1) Par.?

gataḥ kratuṃ maithilasya draṣṭuṃ cāpaṃ sahānujaḥ // (9.2) Par.?

śatānandanimittena viśvāmitraprabhāvitaḥ / (10.1) Par.?

rāmāya kathito rājñā samuniḥ pūjitaḥ kratau // (10.2) Par.?

dhanurāpūrayāmāsa līlayā sa babhañja tat / (11.1) Par.?

vīryaśuklāṃ ca janakaḥ sītāṃ kanyāṃ tvayonijām // (11.2) Par.?

dadau rāmāya rāmo 'pi pitrādau hi samāgate / (12.1) Par.?

upayeme jānakīṃ tām ūrmilāṃ lakṣmaṇas tathā // (12.2) Par.?

śrutakīrtiṃ māṇḍavīṃ ca kuśadhvajasute tathā / (13.1) Par.?

janakasyānujasyaite śatrughnabharatāvubhau // (13.2) Par.?

kanye dve upayemāte janakena supūjitaḥ / (14.1) Par.?

rāmo 'gātsavaśiṣṭhādyair jāmadagnyaṃ vijitya ca / (14.2) Par.?

ayodhyāṃ bharato 'bhyāgāt saśatrughno yudhājitaḥ // (14.3) Par.?

ity ādimahāpurāṇe āgneye rāmāyaṇe bālakāṇḍavarṇanaṃ nāma pañcamo 'dhyāyaḥ // (15.1) Par.?