Texts

pra te ratham mithūkṛtam indro 'vatu dhṛṣṇuyā / (1.1) Par.?

asminn ājau puruhūta śravāyye dhanabhakṣeṣu no 'va // (1.2) Par.?

ut sma vāto vahati vāso 'syā adhirathaṃ yad ajayat sahasram / (2.1) Par.?

rathīr abhūn mudgalānī gaviṣṭau bhare kṛtaṃ vy aced indrasenā // (2.2) Par.?

antar yaccha jighāṃsato vajram indrābhidāsataḥ / (3.1) Par.?

dāsasya vā maghavann āryasya vā sanutar yavayā vadham // (3.2) Par.?

udno hradam apibaj jarhṛṣāṇaḥ kūṭaṃ sma tṛṃhad abhimātim eti / (4.1) Par.?

pra muṣkabhāraḥ śrava icchamāno 'jiram bāhū abharat siṣāsan // (4.2) Par.?

ny akrandayann upayanta enam amehayan vṛṣabham madhya ājeḥ / (5.1) Par.?

tena sūbharvaṃ śatavat sahasraṃ gavām mudgalaḥ pradhane jigāya // (5.2) Par.?

kakardave vṛṣabho yukta āsīd avāvacīt sārathir asya keśī / (6.1) Par.?

dudher yuktasya dravataḥ sahānasa ṛcchanti ṣmā niṣpado mudgalānīm // (6.2) Par.?

uta pradhim ud ahann asya vidvān upāyunag vaṃsagam atra śikṣan / (7.1) Par.?

indra ud āvat patim aghnyānām araṃhata padyābhiḥ kakudmān // (7.2) Par.?

śunam aṣṭrāvy acarat kapardī varatrāyāṃ dārv ānahyamānaḥ / (8.1) Par.?

nṛmṇāni kṛṇvan bahave janāya gāḥ paspaśānas taviṣīr adhatta // (8.2) Par.?

imaṃ tam paśya vṛṣabhasya yuñjaṃ kāṣṭhāyā madhye drughaṇaṃ śayānam / (9.1) Par.?

yena jigāya śatavat sahasraṃ gavām mudgalaḥ pṛtanājyeṣu // (9.2) Par.?

āre aghā ko nv itthā dadarśa yaṃ yuñjanti tam v ā sthāpayanti / (10.1) Par.?

nāsmai tṛṇaṃ nodakam ā bharanty uttaro dhuro vahati pradediśat // (10.2) Par.?

parivṛkteva patividyam ānaṭ pīpyānā kūcakreṇeva siñcan / (11.1) Par.?

eṣaiṣyā cid rathyā jayema sumaṅgalaṃ sinavad astu sātam // (11.2) Par.?

tvaṃ viśvasya jagataś cakṣur indrāsi cakṣuṣaḥ / (12.1) Par.?

vṛṣā yad ājiṃ vṛṣaṇā siṣāsasi codayan vadhriṇā yujā // (12.2) Par.?