Texts

ākūtyai prayuje agnaye svāheti // (1) Par.?

ākūtyā vā ākūtir yakṣyate sya iti // (2) Par.?

prayujaḥ khalu vā enaṃ yajñāya prayuñjate // (3) Par.?

medhāyai manase agnaye svāheti // (4) Par.?

medhayā hi manasā yajñam aśnute // (5) Par.?

dīkṣāyai tapase agnaye svāheti // (6) Par.?

dīkṣayā hi tapasā yajñam aśnute // (7) Par.?

sarasvatyai pūṣṇe agnaye svāheti // (8) Par.?

vāg vai sarasvatī // (9) Par.?

vācā vyāharati // (10) Par.?

yakṣyate sya iti // (11) Par.?

pūṣā khalu vā enaṃ yajñaṃ prāpibad ya enam apūpuṣat // (12) Par.?

āpo devīr bṛhatīr viśvaśaṃbhuvā iti // (13) Par.?

āpo hi yajñaḥ // (14) Par.?

dyāvāpṛthivī uro antarikṣeti // (15) Par.?

dyāvāpṛthivī vā anv antarikṣaṃ yajña upaśritaḥ // (16) Par.?

tata eva yajñam ālabdha // (17) Par.?

bṛhaspatir no haviṣā vṛdhātu svāheti // (18) Par.?

brahma vai bṛhaspatiḥ // (19) Par.?

brahmaṇā vā etat purastāt sarvān kāmān āptvā dīkṣām ālabhate // (20) Par.?

yatra vā asya yajñaḥ śrito yatrayatropaśritas tatastato vā etat sarvaṃ brahmaṇā yajñaṃ saṃbhṛtyālabdha // (21) Par.?

na vā ekāhutir dīkṣitaṃ karoti // (22) Par.?

yad etāni juhoti dvitīyatvāya // (23) Par.?

prajāpatir vai yat kiṃ ca manasādīdhet tad ādhītayajurbhir evāpnot // (24) Par.?

tad ādhītayajuṣām ādhītayajuṣṭvam // (25) Par.?

tad ya evaṃ vidvān ādhītayajūṃṣi juhoti yad eva kiṃ ca manasā dīdhyaj juhoti tad āpnoti // (26) Par.?

ete vai yajñasya saṃbhārāḥ // (27) Par.?

eṣa ha tv eva saṃbhṛtasaṃbhāreṇa yajñena yajate yasyaitāni hūyante // (28) Par.?

etaddha sma vā āhāruṇa aupaveśiḥ // (29) Par.?

kim u sa yajñena yajeta yo yajñasya saṃbhārān na vidyād iti // (30) Par.?

pañcabhir juhoti // (31) Par.?

pāṅkto yajñaḥ // (32) Par.?

yāvān eva yajñas tam ālabdha // (33) Par.?

ṣaḍbhir juhoti // (34) Par.?

ṣaḍ vā ṛtavaḥ // (35) Par.?

ṛtuṣv eva pratitiṣṭhati // (36) Par.?

yajño vai sṛṣṭaḥ // (37) Par.?

pra sāmāvlināt pra yajuḥ // (38) Par.?

taṃ vā ṛg evāyacchat // (39) Par.?

ekā vā enam ṛg ayacchat // (40) Par.?

dvādaśa yajūṃṣi // (41) Par.?

nava sāmāni // (42) Par.?

tasmān navabhir bahiṣpavamāne stuvate // (43) Par.?

nava hy enaṃ sāmāny ayacchan // (44) Par.?

tasmād vātsaṃbandhavido dvādaśabhir audgrabhaṇaṃ juhvati // (45) Par.?

dvādaśa hy enaṃ yajūṃṣy āyacchan // (46) Par.?

etarhi khalu vā eṣa sṛjyate yarhi dīkṣate // (47) Par.?

yad ṛcaudgrabhaṇaṃ juhoti // (48) Par.?

yajñaṃ vā etat sṛṣṭam ṛcāyacchati // (49) Par.?

tasmād āruṇivida ṛcaudgrabhaṇaṃ juhvati // (50) Par.?

ekā hy enam ṛg ayacchat // (51) Par.?