Texts

skandhā na nānyaḥ skandhebhyo nāsmin skandhā na teṣu saḥ / (1.1) Par.?

tathāgataḥ skandhavān na katamo 'tra tathāgataḥ // (1.2) Par.?

buddhaḥ skandhān upādāya yadi nāsti svabhāvataḥ / (2.1) Par.?

svabhāvataś ca yo nāsti kutaḥ sa parabhāvataḥ // (2.2) Par.?

pratītya parabhāvaṃ yaḥ so 'nātmety upapadyate / (3.1) Par.?

yaś cānātmā sa ca kathaṃ bhaviṣyati tathāgataḥ // (3.2) Par.?

yadi nāsti svabhāvaś ca parabhāvaḥ kathaṃ bhavet / (4.1) Par.?

svabhāvaparabhāvābhyām ṛte kaḥ sa tathāgataḥ // (4.2) Par.?

skandhān yady anupādāya bhavet kaścit tathāgataḥ / (5.1) Par.?

sa idānīm upādadyād upādāya tato bhavet // (5.2) Par.?

skandhāṃś cāpy anupādāya nāsti kaścit tathāgataḥ / (6.1) Par.?

yaś ca nāsty anupādāya sa upādāsyate katham // (6.2) Par.?

na bhavaty anupādattam upādānaṃ ca kiṃcana / (7.1) Par.?

na cāsti nirupādānaḥ kathaṃcana tathāgataḥ // (7.2) Par.?

tattvānyatvena yo nāsti mṛgyamāṇaś ca pañcadhā / (8.1) Par.?

upādānena sa kathaṃ prajñapyate tathāgataḥ // (8.2) Par.?

yad apīdam upādānaṃ tat svabhāvān na vidyate / (9.1) Par.?

svabhāvataś ca yan nāsti kutas tat parabhāvataḥ // (9.2) Par.?

evaṃ śūnyam upādānam upādātā ca sarvaśaḥ / (10.1) Par.?

prajñapyate ca śūnyena kathaṃ śūnyas tathāgataḥ // (10.2) Par.?

śūnyam iti na vaktavyam aśūnyam iti vā bhavet / (11.1) Par.?

ubhayaṃ nobhayaṃ ceti prajñaptyarthaṃ tu kathyate // (11.2) Par.?

śāśvatāśāśvatādy atra kutaḥ śānte catuṣṭayam / (12.1) Par.?

antānantādi cāpy atra kutaḥ śānte catuṣṭayam // (12.2) Par.?

ghanagrāho gṛhītas tu yenāstīti tathāgataḥ / (13.1) Par.?

nāstīti sa vikalpayan nirvṛtasyāpi kalpayet // (13.2) Par.?

svabhāvataś ca śūnye 'smiṃś cintā naivopapadyate / (14.1) Par.?

paraṃ nirodhād bhavati buddho na bhavatīti vā // (14.2) Par.?

prapañcayanti ye buddhaṃ prapañcātītam avyayam / (15.1) Par.?

te prapañcahatāḥ sarve na paśyanti tathāgatam // (15.2) Par.?

tathāgato yatsvabhāvas tatsvabhāvam idaṃ jagat / (16.1) Par.?

tathāgato niḥsvabhāvo niḥsvabhāvam idaṃ jagat // (16.2) Par.?