Texts

sa veśmajālaṃ balavān dadarśa vyāsaktavaidūryasuvarṇajālam / (1.1) Par.?

yathā mahat prāvṛṣi meghajālaṃ vidyutpinaddhaṃ savihaṃgajālam // (1.2) Par.?

niveśanānāṃ vividhāśca śālāḥ pradhānaśaṅkhāyudhacāpaśālāḥ / (2.1) Par.?

manoharāścāpi punar viśālā dadarśa veśmādriṣu candraśālāḥ // (2.2) Par.?

gṛhāṇi nānāvasurājitāni devāsuraiś cāpi supūjitāni / (3.1) Par.?

sarvaiśca doṣaiḥ parivarjitāni kapir dadarśa svabalārjitāni // (3.2) Par.?

tāni prayatnābhisamāhitāni mayena sākṣād iva nirmitāni / (4.1) Par.?

mahītale sarvaguṇottarāṇi dadarśa laṅkādhipater gṛhāṇi // (4.2) Par.?

tato dadarśocchritamegharūpaṃ manoharaṃ kāñcanacārurūpam / (5.1) Par.?

rakṣo'dhipasyātmabalānurūpaṃ gṛhottamaṃ hyapratirūparūpam // (5.2) Par.?

mahītale svargam iva prakīrṇaṃ śriyā jvalantaṃ bahuratnakīrṇam / (6.1) Par.?

nānātarūṇāṃ kusumāvakīrṇaṃ girer ivāgraṃ rajasāvakīrṇam // (6.2) Par.?

nārīpravekair iva dīpyamānaṃ taḍidbhir ambhodavad arcyamānam / (7.1) Par.?

haṃsapravekair iva vāhyamānaṃ śriyā yutaṃ khe sukṛtāṃ vimānam // (7.2) Par.?

yathā nagāgraṃ bahudhātucitraṃ yathā nabhaśca grahacandracitram / (8.1) Par.?

dadarśa yuktīkṛtameghacitraṃ vimānaratnaṃ bahuratnacitram // (8.2) Par.?

mahī kṛtā parvatarājipūrṇā śailāḥ kṛtā vṛkṣavitānapūrṇāḥ / (9.1) Par.?

vṛkṣāḥ kṛtāḥ puṣpavitānapūrṇāḥ puṣpaṃ kṛtaṃ kesarapatrapūrṇam // (9.2) Par.?

kṛtāni veśmāni ca pāṇḍurāṇi tathā supuṣpā api puṣkariṇyaḥ / (10.1) Par.?

punaśca padmāni sakesarāṇi dhanyāni citrāṇi tathā vanāni // (10.2) Par.?

puṣpāhvayaṃ nāma virājamānaṃ ratnaprabhābhiśca vivardhamānam / (11.1) Par.?

veśmottamānām api coccamānaṃ mahākapistatra mahāvimānam // (11.2) Par.?

kṛtāśca vaidūryamayā vihaṃgā rūpyapravālaiśca tathā vihaṃgāḥ / (12.1) Par.?

citrāśca nānāvasubhir bhujaṃgā jātyānurūpāsturagāḥ śubhāṅgāḥ // (12.2) Par.?

pravālajāmbūnadapuṣpapakṣāḥ salīlam āvarjitajihmapakṣāḥ / (13.1) Par.?

kāmasya sākṣād iva bhānti pakṣāḥ kṛtā vihaṃgāḥ sumukhāḥ supakṣāḥ // (13.2) Par.?

niyujyamānāśca gajāḥ suhastāḥ sakesarāścotpalapatrahastāḥ / (14.1) Par.?

babhūva devī ca kṛtā suhastā lakṣmīstathā padmini padmahastā // (14.2) Par.?

itīva tad gṛham abhigamya śobhanaṃ savismayo nagam iva cāruśobhanam / (15.1) Par.?

punaśca tat paramasugandhi sundaraṃ himātyaye nagam iva cārukandaram // (15.2) Par.?

tataḥ sa tāṃ kapir abhipatya pūjitāṃ caran purīṃ daśamukhabāhupālitām / (16.1) Par.?

adṛśya tāṃ janakasutāṃ supūjitāṃ suduḥkhitāṃ patiguṇaveganirjitām // (16.2) Par.?

tatastadā bahuvidhabhāvitātmanaḥ kṛtātmano janakasutāṃ suvartmanaḥ / (17.1) Par.?

apaśyato 'bhavad atiduḥkhitaṃ manaḥ sucakṣuṣaḥ pravicarato mahātmanaḥ // (17.2) Par.?