Texts

brāhmaṇa uvāca / (1.1) Par.?

atibhārodyatasyaiva bhārāpanayanaṃ mahat / (1.2) Par.?

parāśvāsakaraṃ vākyam idaṃ me bhavataḥ śrutam // (1.3) Par.?

adhvaklāntasya śayanaṃ sthānaklāntasya cāsanam / (2.1) Par.?

tṛṣitasya ca pānīyaṃ kṣudhārtasya ca bhojanam // (2.2) Par.?

īpsitasyeva saṃprāptir annasya samaye 'titheḥ / (3.1) Par.?

eṣitasyātmanaḥ kāle vṛddhasyeva suto yathā // (3.2) Par.?

manasā cintitasyeva prītisnigdhasya darśanam / (4.1) Par.?

prahlādayati māṃ vākyaṃ bhavatā yad udīritam // (4.2) Par.?

dattacakṣur ivākāśe paśyāmi vimṛśāmi ca / (5.1) Par.?

prajñānavacanād yo 'yam upadeśo hi me kṛtaḥ / (5.2) Par.?

bāḍham evaṃ kariṣyāmi yathā māṃ bhāṣate bhavān // (5.3) Par.?

ihemāṃ rajanīṃ sādho nivasasva mayā saha / (6.1) Par.?

prabhāte yāsyati bhavān paryāśvastaḥ sukhoṣitaḥ / (6.2) Par.?

asau hi bhagavān sūryo mandaraśmir avāṅmukhaḥ // (6.3) Par.?

bhīṣma uvāca / (7.1) Par.?

tatastena kṛtātithyaḥ so 'tithiḥ śatrusūdana / (7.2) Par.?

uvāsa kila tāṃ rātriṃ saha tena dvijena vai // (7.3) Par.?

tat tacca dharmasaṃyuktaṃ tayoḥ kathayatostadā / (8.1) Par.?

vyatītā sā niśā kṛtsnā sukhena divasopamā // (8.2) Par.?

tataḥ prabhātasamaye so 'tithistena pūjitaḥ / (9.1) Par.?

brāhmaṇena yathāśaktyā svakāryam abhikāṅkṣatā // (9.2) Par.?

tataḥ sa vipraḥ kṛtadharmaniścayaḥ kṛtābhyanujñaḥ svajanena dharmavit / (10.1) Par.?

yathopadiṣṭaṃ bhujagendrasaṃśrayaṃ jagāma kāle sukṛtaikaniścayaḥ // (10.2) Par.?