Texts

mārkaṇḍeya uvāca / (1.1) Par.?

tato gacchettu rājendra gautameśvaramuttamam / (1.2) Par.?

sarvapāpaharaṃ tīrthaṃ triṣu lokeṣu viśrutam // (1.3) Par.?

gautamena tapastaptaṃ tatra tīrthe yudhiṣṭhira / (2.1) Par.?

divyaṃ varṣasahasraṃ tu tatastuṣṭo maheśvaraḥ // (2.2) Par.?

praṇamya śirasā tatra sthāpitaḥ parameśvaraḥ / (3.1) Par.?

sthāpito gautameneśo gautameśvara ucyate // (3.2) Par.?

tatra devaiśca gandharvair ṛṣibhiḥ pitṛdaivataiḥ / (4.1) Par.?

samprāptā hyuttamā siddhir ārādhya parameśvaram // (4.2) Par.?

tatra tīrthe tu yaḥ snātvā pūjayet pitṛdevatāḥ / (5.1) Par.?

pūjayet paramīśānaṃ sarvapāpaiḥ pramucyate // (5.2) Par.?

bahavastanna jānanti viṣṇumāyāvimohitāḥ / (6.1) Par.?

tatra saṃnihitaṃ devaṃ śūlapāṇiṃ maheśvaram // (6.2) Par.?

brahmacārī tu yo bhūtvā tatra tīrthe nareśvara / (7.1) Par.?

snātvārcayen mahādevaṃ so 'śvamedhaphalaṃ labhet // (7.2) Par.?

brahmacārī tu yo bhūtvā tarpayet pitṛdevatāḥ / (8.1) Par.?

pūjayet paramīśānaṃ sarvapāpaiḥ pramucyate // (8.2) Par.?

tatra tīrthe tu yo dānaṃ bhaktyā dadyād dvijātaye / (9.1) Par.?

tadakṣayaphalaṃ sarvaṃ nātra kāryā vicāraṇā // (9.2) Par.?

māse cāśvayuje rājan kṛṣṇapakṣe caturdaśīm / (10.1) Par.?

snātvā tatra vidhānena dīpakānāṃ śataṃ dadet // (10.2) Par.?

pūjayitvā mahādevaṃ gandhapuṣpādibhir naraḥ / (11.1) Par.?

mucyate sarvapāpebhyo mṛtaḥ śivapuraṃ vrajet // (11.2) Par.?

aṣṭamyāṃ ca caturdaśyāṃ kārttikyāṃ tu viśeṣataḥ / (12.1) Par.?

upoṣya prayato bhūtvā ghṛtena snāpayecchivam // (12.2) Par.?

pañcagavyena madhunā dadhnā vā śītavāriṇā / (13.1) Par.?

sa ca sarvasya yajñasya phalaṃ prāpnoti mānavaḥ // (13.2) Par.?

bhaktyā tu pūjayet paścāt sa labhet phalamuttamam / (14.1) Par.?

bilvapatrairakhaṇḍaiśca puṣpairunmattakodbhavaiḥ // (14.2) Par.?

kuśāpāmārgasahitaiḥ kadambadroṇajairapi / (15.1) Par.?

mallikākaravīraiśca raktapītaiḥ sitāsitaiḥ // (15.2) Par.?

puṣpairanyairyathālābhaṃ yo naraḥ pūjayecchivam / (16.1) Par.?

nairantaryeṇa ṣaṇmāsaṃ yo 'rcayed gautameśvaram / (16.2) Par.?

sarvānkāmānavāpnoti mṛtaḥ śivapuraṃ vrajet // (16.3) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe gautameśvaratīrthamāhātmyavarṇanaṃ nāma ekonāśītyadhikaśatatamo 'dhyāyaḥ // (17.1) Par.?