Texts

Select a text:
Bibliography

Select a chapter:
1 revision
Show parallels Show headlines
Use dependency labeler

Chapter id: 17467

Sūkta 1

śaśvad didyut kriyamāṇā pratīcī nahi paptata / (1.1) Par.?

pratyak kartāram ṛcchatu // (1.2) Par.?

śaśvantam ic chāśadānam anyasmā iṣūr dihānam / (2.1) Par.?

pratīcī śarur ṛcchatu // (2.2) Par.?

yad etad bhūri śāśadaḥ pratīcīnam apohase / (3.1) Par.?

viṣād iva viṣam addhi tat // (3.2) Par.?

Sūkta 2

namas te pravato napād yatas tapaḥ samūhase / (4.1) Par.?

mṛḍā nas tanūbhyaḥ śaṃ nas tokebhyas kṛdhi // (4.2) Par.?

pravato napān namo astu tubhyaṃ namas te hetaye tapuṣyai / (5.1) Par.?

vidma te dhāma paramaṃ guhā yat samudre antar nihitāsi nābhiḥ // (5.2) Par.?

yāṃ tvā devā ajanayanta viśva iṣuṃ kṛṇvānā asanāya tṛṣvīm / (6.1) Par.?

sā no mṛḍa vidathe gṛṇānā mitrasya ca varuṇasya praśiṣṭau // (6.2) Par.?

Sūkta 3

yūyaṃ naḥ pravato napān marutaḥ sūryatvacaḥ / (7.1) Par.?

śarma yacchātha saprathāḥ // (7.2) Par.?

mamṛḍatā suṣūdatā mṛḍā no aghnyābhyaḥ / (8.1) Par.?

tokāya tanve ca // (8.2) Par.?

namas te astu vidyute namas te stanayitnave / (9.1) Par.?

namas te astv aśmane yenā dūḍāśe asyasi // (9.2) Par.?

Sūkta 4

yo asmān brahmaṇaspate 'devo abhidāsati / (10.1) Par.?

sarvaṃ taṃ rīradhāsi naḥ // (10.2) Par.?

yebhiḥ soma sāhantyāsurān randhayāsai / (11.1) Par.?

tebhir no 'vitā bhuvaḥ // (11.2) Par.?

yāni devā asurāṇām ojāṃsy avṛṇīdhvam / (12.1) Par.?

tebhir no adhi vocata // (12.2) Par.?

Sūkta 5

ud enam uttaraṃ nayāgne ghṛtebhir āhutaḥ / (13.1) Par.?

sam enaṃ varcasā sṛja devānāṃ bhāgadhā asat // (13.2) Par.?

indremaṃ prataraṃ kṛdhi sajātānām asad vaśī / (14.1) Par.?

rāyaspoṣeṇa saṃ sṛja prajayā ca bahuṃ kṛdhi // (14.2) Par.?

yasya kṛṇmo gṛhe havis tam agne vardhayā tvam / (15.1) Par.?

tasmai somo adhi bruvad ayaṃ ca brahmaṇaspatiḥ // (15.2) Par.?

Duration=0.05995512008667 secs.