Texts

dhātā rātiḥ savitedaṃ juṣantāṃ prajāpatir varuṇo mitro agniḥ / (1.1) Par.?

viṣṇus tvaṣṭā prajayā saṃrarāṇo yajamānāya draviṇaṃ dadhātu // (1.2) Par.?

sam indra no manasā neṣi gobhiḥ saṃ sūribhir harivaḥ saṃ svastyā / (2.1) Par.?

saṃ brahmaṇā devakṛtaṃ yad asti saṃ devānāṃ sumatau yajñiyānām // (2.2) Par.?

saṃ varcasā payasā saṃ tanūbhir aganmahi manasā saṃ śivena / (3.1) Par.?

tvaṣṭā sudatro vidadhātu rāyo 'nu no mārṣṭu tanvo yad viriṣṭam // (3.2) Par.?

sugā vo devāḥ sadanā kṛṇomi ya ājagmedaṃ savanaṃ juṣāṇāḥ / (4.1) Par.?

jakṣivāṃsaḥ papivāṃsaś ca viśve 'sme dhatta vasavo vasūni // (4.2) Par.?

yān āvaha uśato deva devāṃs tān preraya sve agne sadhasthe / (5.1) Par.?

vahamānā bharamāṇā havīṃṣy asuṃ gharmaṃ divam ātiṣṭhatānu // (5.2) Par.?

yad adya tvā prayati yajñe asminn agne hotāram avṛṇīmahīha / (6.1) Par.?

ṛdhag ayāḍ ṛdhag utāśamiṣṭa vidvān prajānann upayāhi yajñam // (6.2) Par.?

yajña yajñaṃ gaccha / (7.1) Par.?

yajñapatiṃ gaccha / (7.2) Par.?

svaṃ yoniṃ gaccha svāhā / (7.3) Par.?

eṣa te yajño yajñapate sahasūktavākaḥ suvīraḥ / (7.4) Par.?

tena saṃbhava / (7.5) Par.?

bhrājaṃ gaccha / (7.6) Par.?

devā gātuvido gātuṃ vittvā gātum ita / (7.7) Par.?

manasaspate sudhātv imaṃ yajñaṃ divi deveṣu vāte dhāḥ svāhā // (7.8) Par.?