Texts

ṣaṭ padāny anu nikrāmati // (1) Par.?

ṣaḍahaṃ vāṅ nātivadati // (2) Par.?

uta saṃvatsarasyāyane yāvaty eva vāk tām avarunddhe // (3) Par.?

saptame pade juhoti // (4) Par.?

saptapadā śakvarī // (5) Par.?

paśavaḥ śakvarī // (6) Par.?

paśūn evāvarunddhe // (7) Par.?

sapta grāmyāḥ paśavaḥ // (8) Par.?

saptāraṇyāḥ // (9) Par.?

sapta chandāṃsi // (10) Par.?

ubhayasyāvaruddhyai // (11) Par.?

vasvy asi // (12) Par.?

rudrāsīty āha // (13) Par.?

rūpam evāsyā etan mahimānam vyācaṣṭe // (14) Par.?

bṛhaspatis tvā sumne raṇvatv ity āha // (15) Par.?

brahma vai devānām bṛhaspatiḥ // (16) Par.?

brahmaṇaivāsmai paśūn avarunddhe // (17) Par.?

rudro vasubhir āciketv ity āha // (18) Par.?

āvṛttyai // (19) Par.?

pṛthivyās tvā mūrdhann ājigharmi devayajana ity āha // (20) Par.?

pṛthivyā hy eṣa mūrdhā yad devayajanam // (21) Par.?

iḍāyāḥ pada ity āha // (22) Par.?

iḍāyai hy etat padaṃ yat somakrayaṇyai // (23) Par.?

ghṛtavati svāhā ity āha // (24) Par.?

yad evāsyai padād ghṛtam apīḍyata // (25) Par.?

tasmād evam āha // (26) Par.?

yad adhvaryur anagnāv āhutiṃ juhuyād andho 'dhvaryuḥ syād rakṣāṃsi yajñaṃ hanyuḥ // (27) Par.?

hiraṇyam upāsya juhoti // (28) Par.?

agnivaty eva juhoti // (29) Par.?

nāndho 'dhvaryuḥ bhavati // (30) Par.?

na yajñaṃ rakṣāṃsi ghnanti // (31) Par.?

kāṇḍe kāṇḍe vai kriyamāṇe yajñaṃ rakṣāṃsi jighāṃsanti // (32) Par.?

parilikhitaṃ rakṣaḥ // (33) Par.?

parilikhitā arātaya ity āha // (34) Par.?

rakṣasām apahatyai // (35.1) Par.?

idam ahaṃ rakṣaso grīvā apikṛntāmi yo 'smān dveṣṭi yaṃ ca vayaṃ dviṣma ity āha // (36) Par.?

dvau vāva puruṣau yaṃ caiva dveṣṭi yaś cainaṃ dveṣṭi // (37) Par.?

tayor evānantarāyaṃ grīvāḥ kṛntati // (38) Par.?

paśavo vai somakrayaṇyai padam // (39) Par.?

yāvattmūtaṃ saṃvapati // (40) Par.?

paśūn evāvarunddhe // (41) Par.?

asme rāya iti saṃvapati // (42) Par.?

ātmānam evādhvaryuḥ paśubhyo nāntareti // (43) Par.?

tve rāya iti yajamānāya prayacchati // (44) Par.?

yajamāna eva rayiṃ dadhāti // (45) Par.?

tote rāya iti patniyai // (46) Par.?

ardho vā eṣa ātmano yat patnī // (47) Par.?

yathā gṛheṣu nidhatte tādṛg eva tat // (48) Par.?

tvaṣṭīmatī te sapeyety āha // (49) Par.?

tvaṣṭā vai paśūnām mithunānāṃ rūpakṛt // (50) Par.?

rūpam eva paśuṣu dadhāti // (51) Par.?

asmai vai lokāya gārhapatya ādhīyate // (52) Par.?

amuṣmā āhavanīyaḥ // (53) Par.?

yad gārhapatya upavaped asmiṃlloke paśumānt syāt // (54) Par.?

yad āhavanīye 'muṣmiṃlloke paśumānt syāt // (55) Par.?

ubhayor upavapati // (56) Par.?

ubhayor evainaṃ lokayoḥ paśumantaṃ karoti // (57) Par.?