Texts

yuvāṃ narā paśyamānāsa āpyam prācā gavyantaḥ pṛthuparśavo yayuḥ / (1.1) Par.?

dāsā ca vṛtrā hatam āryāṇi ca sudāsam indrāvaruṇāvasāvatam // (1.2) Par.?

yatrā naraḥ samayante kṛtadhvajo yasminn ājā bhavati kiṃ cana priyam / (2.1) Par.?

yatrā bhayante bhuvanā svardṛśas tatrā na indrāvaruṇādhi vocatam // (2.2) Par.?

sam bhūmyā antā dhvasirā adṛkṣatendrāvaruṇā divi ghoṣa āruhat / (3.1) Par.?

asthur janānām upa mām arātayo 'rvāg avasā havanaśrutā gatam // (3.2) Par.?

indrāvaruṇā vadhanābhir aprati bhedaṃ vanvantā pra sudāsam āvatam / (4.1) Par.?

brahmāṇy eṣāṃ śṛṇutaṃ havīmani satyā tṛtsūnām abhavat purohitiḥ // (4.2) Par.?

indrāvaruṇāv abhy ā tapanti māghāny aryo vanuṣām arātayaḥ / (5.1) Par.?

yuvaṃ hi vasva ubhayasya rājatho 'dha smā no 'vatam pārye divi // (5.2) Par.?

yuvāṃ havanta ubhayāsa ājiṣv indraṃ ca vasvo varuṇaṃ ca sātaye / (6.1) Par.?

yatra rājabhir daśabhir nibādhitam pra sudāsam āvataṃ tṛtsubhiḥ saha // (6.2) Par.?

daśa rājānaḥ samitā ayajyavaḥ sudāsam indrāvaruṇā na yuyudhuḥ / (7.1) Par.?

satyā nṛṇām admasadām upastutir devā eṣām abhavan devahūtiṣu // (7.2) Par.?

dāśarājñe pariyattāya viśvataḥ sudāsa indrāvaruṇāv aśikṣatam / (8.1) Par.?

śvityañco yatra namasā kapardino dhiyā dhīvanto asapanta tṛtsavaḥ // (8.2) Par.?

vṛtrāṇy anyaḥ samitheṣu jighnate vratāny anyo abhi rakṣate sadā / (9.1) Par.?

havāmahe vāṃ vṛṣaṇā suvṛktibhir asme indrāvaruṇā śarma yacchatam // (9.2) Par.?

asme indro varuṇo mitro aryamā dyumnaṃ yacchantu mahi śarma saprathaḥ / (10.1) Par.?

avadhraṃ jyotir aditer ṛtāvṛdho devasya ślokaṃ savitur manāmahe // (10.2) Par.?