Texts

gate rāme praśāntātmā rāmo dāśarathir dhanuḥ / (1.1) Par.?

varuṇāyāprameyāya dadau haste sasāyakam // (1.2) Par.?

abhivādya tato rāmo vasiṣṭhapramukhān ṛṣīn / (2.1) Par.?

pitaraṃ vihvalaṃ dṛṣṭvā provāca raghunandanaḥ // (2.2) Par.?

jāmadagnyo gato rāmaḥ prayātu caturaṅgiṇī / (3.1) Par.?

ayodhyābhimukhī senā tvayā nāthena pālitā // (3.2) Par.?

rāmasya vacanaṃ śrutvā rājā daśarathaḥ sutam / (4.1) Par.?

bāhubhyāṃ sampariṣvajya mūrdhni cāghrāya rāghavam // (4.2) Par.?

gato rāma iti śrutvā hṛṣṭaḥ pramudito nṛpaḥ / (5.1) Par.?

codayāmāsa tāṃ senāṃ jagāmāśu tataḥ purīm // (5.2) Par.?

patākādhvajinīṃ ramyāṃ tūryodghuṣṭanināditām / (6.1) Par.?

siktarājapathāṃ ramyāṃ prakīrṇakusumotkarām // (6.2) Par.?

rājapraveśasumukhaiḥ paurair maṅgalavādibhiḥ / (7.1) Par.?

sampūrṇāṃ prāviśad rājā janaughaiḥ samalaṃkṛtām // (7.2) Par.?

kausalyā ca sumitrā ca kaikeyī ca sumadhyamā / (8.1) Par.?

vadhūpratigrahe yuktā yāś cānyā rājayoṣitaḥ // (8.2) Par.?

tataḥ sītāṃ mahābhāgām ūrmilāṃ ca yaśasvinīm / (9.1) Par.?

kuśadhvajasute cobhe jagṛhur nṛpapatnayaḥ // (9.2) Par.?

maṅgalālāpanaiś caiva śobhitāḥ kṣaumavāsasaḥ / (10.1) Par.?

devatāyatanāny āśu sarvās tāḥ pratyapūjayan // (10.2) Par.?

abhivādyābhivādyāṃś ca sarvā rājasutās tadā / (11.1) Par.?

remire muditāḥ sarvā bhartṛbhiḥ sahitā rahaḥ // (11.2) Par.?

kṛtadārāḥ kṛtāstrāś ca sadhanāḥ sasuhṛjjanāḥ / (12.1) Par.?

śuśrūṣamāṇāḥ pitaraṃ vartayanti nararṣabhāḥ // (12.2) Par.?

teṣām atiyaśā loke rāmaḥ satyaparākramaḥ / (13.1) Par.?

svayambhūr iva bhūtānāṃ babhūva guṇavattaraḥ // (13.2) Par.?

rāmas tu sītayā sārdhaṃ vijahāra bahūn ṛtūn / (14.1) Par.?

manasvī tadgatas tasyā nityaṃ hṛdi samarpitaḥ // (14.2) Par.?

priyā tu sītā rāmasya dārāḥ pitṛkṛtā iti / (15.1) Par.?

guṇād rūpaguṇāc cāpi prītir bhūyo vyavardhata // (15.2) Par.?

tasyāś ca bhartā dviguṇaṃ hṛdaye parivartate / (16.1) Par.?

antarjātam api vyaktam ākhyāti hṛdayaṃ hṛdā // (16.2) Par.?

tasya bhūyo viśeṣeṇa maithilī janakātmajā / (17.1) Par.?

devatābhiḥ samā rūpe sītā śrīr iva rūpiṇī // (17.2) Par.?

tayā sa rājarṣisuto 'bhirāmayā sameyivān uttamarājakanyayā / (18.1) Par.?

atīva rāmaḥ śuśubhe 'tikāmayā vibhuḥ śriyā viṣṇur ivāmareśvaraḥ // (18.2) Par.?