Texts

darśanārthaṃ tu vaidehyāḥ sarvataḥ kapiyūthapāḥ / (1.1) Par.?

vyādiṣṭāḥ kapirājena yathoktaṃ jagmur añjasā // (1.2) Par.?

sarāṃsi saritaḥ kakṣān ākāśaṃ nagarāṇi ca / (2.1) Par.?

nadīdurgāṃs tathā śailān vicinvanti samantataḥ // (2.2) Par.?

sugrīveṇa samākhyātān sarve vānarayūthapāḥ / (3.1) Par.?

pradeśān pravicinvanti saśailavanakānanān // (3.2) Par.?

vicintya divasaṃ sarve sītādhigamane dhṛtāḥ / (4.1) Par.?

samāyānti sma medinyāṃ niśākāleṣu vānarāḥ // (4.2) Par.?

sarvartukāṃś ca deśeṣu vānarāḥ saphalān drumān / (5.1) Par.?

āsādya rajanīṃ śayyāṃ cakruḥ sarveṣv ahaḥsu te // (5.2) Par.?

tad ahaḥ prathamaṃ kṛtvā māse prasravaṇaṃ gatāḥ / (6.1) Par.?

kapirājena saṃgamya nirāśāḥ kapiyūthapāḥ // (6.2) Par.?

vicitya tu diśaṃ pūrvāṃ yathoktāṃ sacivaiḥ saha / (7.1) Par.?

adṛṣṭvā vinataḥ sītām ājagāma mahābalaḥ // (7.2) Par.?

uttarāṃ tu diśaṃ sarvāṃ vicitya sa mahākapiḥ / (8.1) Par.?

āgataḥ saha sainyena vīraḥ śatabalis tadā // (8.2) Par.?

suṣeṇaḥ paścimām āśāṃ vicitya saha vānaraiḥ / (9.1) Par.?

sametya māse sampūrṇe sugrīvam upacakrame // (9.2) Par.?

taṃ prasravaṇapṛṣṭhasthaṃ samāsādyābhivādya ca / (10.1) Par.?

āsīnaṃ saha rāmeṇa sugrīvam idam abruvan // (10.2) Par.?

vicitāḥ parvatāḥ sarve vanāni nagarāṇi ca / (11.1) Par.?

nimnagāḥ sāgarāntāś ca sarve janapadās tathā // (11.2) Par.?

guhāś ca vicitāḥ sarvā yās tvayā parikīrtitāḥ / (12.1) Par.?

vicitāś ca mahāgulmā latāvitatasaṃtatāḥ // (12.2) Par.?

gahaneṣu ca deśeṣu durgeṣu viṣameṣu ca / (13.1) Par.?

sattvāny atipramāṇāni vicitāni hatāni ca / (13.2) Par.?

ye caiva gahanā deśā vicitās te punaḥ punaḥ // (13.3) Par.?

udārasattvābhijano mahātmā sa maithilīṃ drakṣyati vānarendraḥ / (14.1) Par.?

diśaṃ tu yām eva gatā tu sītā tām āsthito vāyusuto hanūmān // (14.2) Par.?