Texts

bhīṣma uvāca / (1.1) Par.?

sa vanāni vicitrāṇi tīrthāni ca sarāṃsi ca / (1.2) Par.?

abhigacchan krameṇa sma kaṃcinmunim upasthitaḥ // (1.3) Par.?

taṃ sa tena yathoddiṣṭaṃ nāgaṃ vipreṇa brāhmaṇaḥ / (2.1) Par.?

paryapṛcchad yathānyāyaṃ śrutvaiva ca jagāma saḥ // (2.2) Par.?

so 'bhigamya yathākhyātaṃ nāgāyatanam arthavit / (3.1) Par.?

proktavān aham asmīti bhoḥśabdālaṃkṛtaṃ vacaḥ // (3.2) Par.?

tatastasya vacaḥ śrutvā rūpiṇī dharmavatsalā / (4.1) Par.?

darśayāmāsa taṃ vipraṃ nāgapatnī pativratā // (4.2) Par.?

sā tasmai vidhivat pūjāṃ cakre dharmaparāyaṇā / (5.1) Par.?

svāgatenāgataṃ kṛtvā kiṃ karomīti cābravīt // (5.2) Par.?

brāhmaṇa uvāca / (6.1) Par.?

viśrānto 'bhyarcitaścāsmi bhavatyā ślakṣṇayā girā / (6.2) Par.?

draṣṭum icchāmi bhavati taṃ devaṃ nāgam uttamam // (6.3) Par.?

etaddhi paramaṃ kāryam etanme phalam īpsitam / (7.1) Par.?

anenārthena cāsmyadya samprāptaḥ pannagālayam // (7.2) Par.?

nāgabhāryovāca / (8.1) Par.?

ārya sūryarathaṃ voḍhuṃ gato 'sau māsacārikaḥ / (8.2) Par.?

saptāṣṭabhir dinair vipra darśayiṣyatyasaṃśayam // (8.3) Par.?

etad viditam āryasya vivāsakaraṇaṃ mama / (9.1) Par.?

bhartur bhavatu kiṃ cānyat kriyatāṃ tad vadasva me // (9.2) Par.?

brāhmaṇa uvāca / (10.1) Par.?

anena niścayenāhaṃ sādhvi samprāptavān iha / (10.2) Par.?

pratīkṣann āgamaṃ devi vatsyāmyasminmahāvane // (10.3) Par.?

samprāptasyaiva cāvyagram āvedyo 'ham ihāgataḥ / (11.1) Par.?

mamābhigamanaṃ prāpto vācyaśca vacanaṃ tvayā // (11.2) Par.?

aham apyatra vatsyāmi gomatyāḥ puline śubhe / (12.1) Par.?

kālaṃ parimitāhāro yathoktaṃ paripālayan // (12.2) Par.?

bhīṣma uvāca / (13.1) Par.?

tataḥ sa viprastāṃ nāgīṃ samādhāya punaḥ punaḥ / (13.2) Par.?

tad eva pulinaṃ nadyāḥ prayayau brāhmaṇarṣabhaḥ // (13.3) Par.?