Texts

vaiśaṃpāyana uvāca / (1.1) Par.?

tatastasminmuniśreṣṭhā rājānaṃ draṣṭum abhyayuḥ / (1.2) Par.?

nāradaḥ parvataścaiva devalaśca mahātapāḥ // (1.3) Par.?

dvaipāyanaḥ saśiṣyaśca siddhāścānye manīṣiṇaḥ / (2.1) Par.?

śatayūpaśca rājarṣir vṛddhaḥ paramadhārmikaḥ // (2.2) Par.?

teṣāṃ kuntī mahārāja pūjāṃ cakre yathāvidhi / (3.1) Par.?

te cāpi tutuṣustasyāstāpasāḥ paricaryayā // (3.2) Par.?

tatra dharmyāḥ kathāstāta cakruste paramarṣayaḥ / (4.1) Par.?

ramayanto mahātmānaṃ dhṛtarāṣṭraṃ janādhipam // (4.2) Par.?

kathāntare tu kasmiṃścid devarṣir nāradastadā / (5.1) Par.?

kathām imām akathayat sarvapratyakṣadarśivān // (5.2) Par.?

purā prajāpatisamo rājāsīd akutobhayaḥ / (6.1) Par.?

sahasracitya ityuktaḥ śatayūpapitāmahaḥ // (6.2) Par.?

sa putre rājyam āsajya jyeṣṭhe paramadhārmike / (7.1) Par.?

sahasracityo dharmātmā praviveśa vanaṃ nṛpaḥ // (7.2) Par.?

sa gatvā tapasaḥ pāraṃ dīptasya sa narādhipaḥ / (8.1) Par.?

puraṃdarasya saṃsthānaṃ pratipede mahāmanāḥ // (8.2) Par.?

dṛṣṭapūrvaḥ sa bahuśo rājan saṃpatatā mayā / (9.1) Par.?

mahendrasadane rājā tapasā dagdhakilbiṣaḥ // (9.2) Par.?

tathā śailālayo rājā bhagadattapitāmahaḥ / (10.1) Par.?

tapobalenaiva nṛpo mahendrasadanaṃ gataḥ // (10.2) Par.?

tathā pṛṣadhro nāmāsīd rājā vajradharopamaḥ / (11.1) Par.?

sa cāpi tapasā lebhe nākapṛṣṭham ito nṛpaḥ // (11.2) Par.?

asminn araṇye nṛpate māndhātur api cātmajaḥ / (12.1) Par.?

purukutso nṛpaḥ siddhiṃ mahatīṃ samavāptavān // (12.2) Par.?

bhāryā samabhavad yasya narmadā saritāṃ varā / (13.1) Par.?

so 'sminn araṇye nṛpatistapastaptvā divaṃ gataḥ // (13.2) Par.?

śaśalomā ca nāmāsīd rājā paramadhārmikaḥ / (14.1) Par.?

sa cāpyasmin vane taptvā tapo divam avāptavān // (14.2) Par.?

dvaipāyanaprasādācca tvam apīdaṃ tapovanam / (15.1) Par.?

rājann avāpya duṣprāpāṃ siddhim agryāṃ gamiṣyasi // (15.2) Par.?

tvaṃ cāpi rājaśārdūla tapaso 'nte śriyā vṛtaḥ / (16.1) Par.?

gāndhārīsahito gantā gatiṃ teṣāṃ mahātmanām // (16.2) Par.?

pāṇḍuḥ smarati nityaṃ ca balahantuḥ samīpataḥ / (17.1) Par.?

tvāṃ sadaiva mahīpāla sa tvāṃ śreyasi yokṣyati // (17.2) Par.?

tava śuśrūṣayā caiva gāndhāryāśca yaśasvinī / (18.1) Par.?

bhartuḥ salokatāṃ kuntī gamiṣyati vadhūstava // (18.2) Par.?

yudhiṣṭhirasya jananī sa hi dharmaḥ sanātanaḥ / (19.1) Par.?

vayam etat prapaśyāmo nṛpate divyacakṣuṣā // (19.2) Par.?

pravekṣyati mahātmānaṃ viduraśca yudhiṣṭhiram / (20.1) Par.?

saṃjayastvadanudhyānāt pūtaḥ svargam avāpsyati // (20.2) Par.?

etacchrutvā kauravendro mahātmā sahaiva patnyā prītimān pratyagṛhṇāt / (21.1) Par.?

vidvān vākyaṃ nāradasya praśasya cakre pūjāṃ cātulāṃ nāradāya // (21.2) Par.?

tathā sarve nāradaṃ viprasaṃghāḥ saṃpūjayāmāsur atīva rājan / (22.1) Par.?

rājñaḥ prītyā dhṛtarāṣṭrasya te vai punaḥ punaḥ samahṛṣṭāstadānīm // (22.2) Par.?