Texts

prajāpatiṃ vai prajāḥ sṛjamānam pāpmā mṛtyur abhiparijaghāna / (1.1) Par.?

sa tapo 'tapyata sahasraṃ saṃvatsarān pāpmānaṃ vijihāsan // (1.2) Par.?

tasya tapas tepānasya ebhyo lomagartebhya ūrdhvāni jyotīṃṣy āyan / (2.1) Par.?

tad yāni tāni jyotīṃṣy etāni tāni nakṣatrāṇi / (2.2) Par.?

yāvanty etāni nakṣatrāṇi tāvanto lomagartāḥ / (2.3) Par.?

yāvanto lomagartās tāvantaḥ sahasrasaṃvatsarasya muhūrtāḥ // (2.4) Par.?

sa sahasratame saṃvatsare sarvo 'tyapavata / (3.1) Par.?

sa yaḥ so 'tyapavatāyam eva sa vāyur yo'yaṃ pavate / (3.2) Par.?

atha yaṃ tam pāpmānam atyapavatedaṃ taccharīram / (3.3) Par.?

ka u tasmai manuṣyo yaḥ sahasrasaṃvatsaram avarundhīta / (3.4) Par.?

vidyayā ha vā evaṃvit sahasrasaṃvatsaram avarunddhe // (3.5) Par.?

sarvā evaitā iṣṭakāḥ sāhasrīr upāsīta / (4.1) Par.?

rātrisahasreṇa rātrisahasreṇaikaikām pariśritaṃ sampannām upāsītāhaḥsahasreṇāhaḥsahasreṇaikaikām aharbhājam ardhamāsasahasreṇārdhamāsasahasreṇaikaikām ardhamāsabhājaṃ māsasahasreṇa māsasahasreṇaikaikāṃ māsabhājam ṛtusahasreṇartusahasreṇaikaikām ṛtubhājaṃ muhūrtasahasreṇa muhūrtasahasreṇaikaikām muhūrtabhājaṃ saṃvatsarasahasreṇa saṃvatsaram / (4.2) Par.?

te ya etam evam agniṃ saṃvatsareṇa sampannaṃ viduḥ sahasratamīṃ hāsya te kalāṃ viduḥ / (4.3) Par.?

atha ya enam evaṃ na viduḥ na hāsya te sahasratamīṃ cana kalāṃ viduḥ / (4.4) Par.?

atha ya evaivaṃ veda yo vaitat karma kurute sa haivaitaṃ sarvaṃ kṛtsnam prājāpatyam agnim āpnoti yam prajāpatir āpnot / (4.5) Par.?

tasmād evaṃvit tapa eva tapyeta / (4.6) Par.?

yad u ha vā evaṃvit tapa tapyata ā maithunāt sarvaṃ hāsya tat svargaṃ lokam abhisaṃbhavati // (4.7) Par.?

tad etad ṛcābhyuktaṃ na mṛṣā śrāntaṃ yad avanti devā iti / (5.1) Par.?

na haivaivaṃ viduṣaḥ kiṃ cana mṛṣā śrāntam bhavati / (5.2) Par.?

tatho hāsyaitat sarvaṃ devā avanti // (5.3) Par.?