Texts

prātā ratho navo yoji sasniś caturyugas trikaśaḥ saptaraśmiḥ / (1.1) Par.?

daśāritro manuṣyaḥ svarṣāḥ sa iṣṭibhir matibhī raṃhyo bhūt // (1.2) Par.?

sāsmā aram prathamaṃ sa dvitīyam uto tṛtīyam manuṣaḥ sa hotā / (2.1) Par.?

anyasyā garbham anya ū jananta so anyebhiḥ sacate jenyo vṛṣā // (2.2) Par.?

harī nu kaṃ ratha indrasya yojam āyai sūktena vacasā navena / (3.1) Par.?

mo ṣu tvām atra bahavo hi viprā ni rīraman yajamānāso anye // (3.2) Par.?

ā dvābhyāṃ haribhyām indra yāhy ā caturbhir ā ṣaḍbhir hūyamānaḥ / (4.1) Par.?

āṣṭābhir daśabhiḥ somapeyam ayaṃ sutaḥ sumakha mā mṛdhas kaḥ // (4.2) Par.?

ā viṃśatyā triṃśatā yāhy arvāṅ ā catvāriṃśatā haribhir yujānaḥ / (5.1) Par.?

ā pañcāśatā surathebhir indrā ṣaṣṭyā saptatyā somapeyam // (5.2) Par.?

āśītyā navatyā yāhy arvāṅ ā śatena haribhir uhyamānaḥ / (6.1) Par.?

ayaṃ hi te śunahotreṣu soma indra tvāyā pariṣikto madāya // (6.2) Par.?

mama brahmendra yāhy acchā viśvā harī dhuri dhiṣvā rathasya / (7.1) Par.?

purutrā hi vihavyo babhūthāsmiñchūra savane mādayasva // (7.2) Par.?

na ma indreṇa sakhyaṃ vi yoṣad asmabhyam asya dakṣiṇā duhīta / (8.1) Par.?

upa jyeṣṭhe varūthe gabhastau prāye prāye jigīvāṃsaḥ syāma // (8.2) Par.?

nūnaṃ sā te prati varaṃ jaritre duhīyad indra dakṣiṇā maghonī / (9.1) Par.?

śikṣā stotṛbhyo māti dhag bhago no bṛhad vadema vidathe suvīrāḥ // (9.2) Par.?