Texts

śruṣṭī vāṃ yajña udyataḥ sajoṣā manuṣvad vṛktabarhiṣo yajadhyai / (1.1) Par.?

ā ya indrāvaruṇāv iṣe adya mahe sumnāya maha āvavartat // (1.2) Par.?

tā hi śreṣṭhā devatātā tujā śūrāṇāṃ śaviṣṭhā tā hi bhūtam / (2.1) Par.?

maghonām maṃhiṣṭhā tuviśuṣma ṛtena vṛtraturā sarvasenā // (2.2) Par.?

tā gṛṇīhi namasyebhiḥ śūṣaiḥ sumnebhir indrāvaruṇā cakānā / (3.1) Par.?

vajreṇānyaḥ śavasā hanti vṛtraṃ siṣakty anyo vṛjaneṣu vipraḥ // (3.2) Par.?

gnāś ca yan naraś ca vāvṛdhanta viśve devāso narāṃ svagūrtāḥ / (4.1) Par.?

praibhya indrāvaruṇā mahitvā dyauś ca pṛthivi bhūtam urvī // (4.2) Par.?

sa it sudānuḥ svavāṁ ṛtāvendrā yo vāṃ varuṇa dāśati tman / (5.1) Par.?

iṣā sa dviṣas tared dāsvān vaṃsad rayiṃ rayivataś ca janān // (5.2) Par.?

yaṃ yuvaṃ dāśvadhvarāya devā rayiṃ dhattho vasumantam purukṣum / (6.1) Par.?

asme sa indrāvaruṇāv api ṣyāt pra yo bhanakti vanuṣām aśastīḥ // (6.2) Par.?

uta naḥ sutrātro devagopāḥ sūribhya indrāvaruṇā rayiḥ ṣyāt / (7.1) Par.?

yeṣāṃ śuṣmaḥ pṛtanāsu sāhvān pra sadyo dyumnā tirate taturiḥ // (7.2) Par.?

nū na indrāvaruṇā gṛṇānā pṛṅktaṃ rayiṃ sauśravasāya devā / (8.1) Par.?

itthā gṛṇanto mahinasya śardho 'po na nāvā duritā tarema // (8.2) Par.?

pra samrāje bṛhate manma nu priyam arca devāya varuṇāya saprathaḥ / (9.1) Par.?

ayaṃ ya urvī mahinā mahivrataḥ kratvā vibhāty ajaro na śociṣā // (9.2) Par.?

indrāvaruṇā sutapāv imaṃ sutaṃ somam pibatam madyaṃ dhṛtavratā / (10.1) Par.?

yuvo ratho adhvaraṃ devavītaye prati svasaram upa yāti pītaye // (10.2) Par.?

indrāvaruṇā madhumattamasya vṛṣṇaḥ somasya vṛṣaṇā vṛṣethām / (11.1) Par.?

idaṃ vām andhaḥ pariṣiktam asme āsadyāsmin barhiṣi mādayethām // (11.2) Par.?