Texts

harim mṛjanty aruṣo na yujyate saṃ dhenubhiḥ kalaśe somo ajyate / (1.1) Par.?

ud vācam īrayati hinvate matī puruṣṭutasya kati cit paripriyaḥ // (1.2) Par.?

sākaṃ vadanti bahavo manīṣiṇa indrasya somaṃ jaṭhare yad āduhuḥ / (2.1) Par.?

yadī mṛjanti sugabhastayo naraḥ sanīﾱābhir daśabhiḥ kāmyam madhu // (2.2) Par.?

aramamāṇo aty eti gā abhi sūryasya priyaṃ duhitus tiro ravam / (3.1) Par.?

anv asmai joṣam abharad vinaṅgṛsaḥ saṃ dvayībhiḥ svasṛbhiḥ kṣeti jāmibhiḥ // (3.2) Par.?

nṛdhūto adriṣuto barhiṣi priyaḥ patir gavām pradiva indur ṛtviyaḥ / (4.1) Par.?

purandhivān manuṣo yajñasādhanaḥ śucir dhiyā pavate soma indra te // (4.2) Par.?

nṛbāhubhyāṃ codito dhārayā suto 'nuṣvadham pavate soma indra te / (5.1) Par.?

āprāḥ kratūn sam ajair adhvare matīr ver na druṣac camvor āsadaddhariḥ // (5.2) Par.?

aṃśuṃ duhanti stanayantam akṣitaṃ kaviṃ kavayo 'paso manīṣiṇaḥ / (6.1) Par.?

sam ī gāvo matayo yanti saṃyata ṛtasya yonā sadane punarbhuvaḥ // (6.2) Par.?

nābhā pṛthivyā dharuṇo maho divo 'pām ūrmau sindhuṣv antar ukṣitaḥ / (7.1) Par.?

indrasya vajro vṛṣabho vibhūvasuḥ somo hṛde pavate cāru matsaraḥ // (7.2) Par.?

sa tū pavasva pari pārthivaṃ raja stotre śikṣann ādhūnvate ca sukrato / (8.1) Par.?

mā no nir bhāg vasunaḥ sādanaspṛśo rayim piśaṅgam bahulaṃ vasīmahi // (8.2) Par.?

ā tū na indo śatadātv aśvyaṃ sahasradātu paśumaddhiraṇyavat / (9.1) Par.?

upa māsva bṛhatī revatīr iṣo 'dhi stotrasya pavamāna no gahi // (9.2) Par.?