Texts

sattriprayogād ūrdhvaṃ siddhavyañjanā māṇavān māṇavavidyābhiḥ pralobhayeyuḥ prasvāpanāntardhānadvārāpohamantreṇa pratirodhakān saṃvadanamantreṇa pāratalpikān // (1.1) Par.?

teṣāṃ kṛtotsāhānāṃ mahāntaṃ saṃgham ādāya rātrāvanyaṃ grāmam uddiśyānyaṃ grāmaṃ kṛtakastrīpuruṣaṃ gatvā brūyuḥ ihaiva vidyāprabhāvo dṛśyatāṃ kṛcchraḥ paragrāmo gantum iti // (2.1) Par.?

tato dvārāpohamantreṇa dvārāṇyapohya praviśyatām iti brūyuḥ // (3.1) Par.?

antardhānamantreṇa jāgratām ārakṣiṇāṃ madhyena māṇavān atikrāmayeyuḥ // (4.1) Par.?

prasvāpanamantreṇa prasvāpayitvā rakṣiṇaḥ śayābhir māṇavaiḥ saṃcārayeyuḥ // (5.1) Par.?

saṃvadanamantreṇa bhāryāvyañjanāḥ pareṣāṃ māṇavaiḥ saṃmodayeyuḥ // (6.1) Par.?

upalabdhavidyāprabhāvāṇāṃ puraścaraṇādyādiśeyur abhijñānārtham // (7.1) Par.?

kṛtalakṣaṇadravyeṣu vā veśmasu karma kārayeyuḥ // (8.1) Par.?

anupraviṣṭā vaikatra grāhayeyuḥ // (9.1) Par.?

kṛtalakṣaṇadravyakrayavikrayādhāneṣu yogasurāmattān vā grāhayeyuḥ // (10.1) Par.?

gṛhītān pūrvāpadānasahāyān anuyuñjīta // (11.1) Par.?

purāṇacoravyañjanā vā corān anupraviṣṭāstathaiva karma kārayeyur grāhayeyuśca // (12.1) Par.?

gṛhītān samāhartā paurajānapadānāṃ darśayet coragrahaṇīṃ vidyām adhīte rājā tasyopadeśād ime corā gṛhītāḥ bhūyaśca grahīṣyāmi vārayitavyo vaḥ svajanaḥ pāpācāra iti // (13.1) Par.?

yaṃ cātrāpasarpopadeśena śamyāpratodādīnām apahartāraṃ jānīyāt tam eṣāṃ pratyādiśed eṣa rājñaḥ prabhāvaḥ iti // (14.1) Par.?

purāṇacoragopālakavyādhaśvagaṇinaśca vanacorāṭavikān anupraviṣṭāḥ prabhūtakūṭahiraṇyakupyabhāṇḍeṣu sārthavrajagrāmeṣvenān abhiyojayeyuḥ // (15.1) Par.?

abhiyoge gūḍhabalair ghātayeyuḥ madanarasayuktena vā pathyadanena // (16.1) Par.?

gṛhītaloptrabhārān āyatagatapariśrāntān prasvapataḥ prahavaṇeṣu yogasurāmattān vā grāhayeyuḥ // (17.1) Par.?

pūrvavacca gṛhītvainān samāhartā prarūpayet / (18.1) Par.?

sarvajñakhyāpanaṃ rājñaḥ kārayan rāṣṭravāsiṣu // (18.2) Par.?