Texts

tasmād bhūtasaṃghātasambhavāt kāraṇāddravyaṃ naikarasam api tv anekarasam // (1) Par.?

evaṃ dravyavad rasasyāpi bhūtasaṃghātasambhavatvam // (2) Par.?

ata eva prati dravyaṃ madhurādirasasya nānāsvādopalambhaḥ // (3) Par.?

tathā ca drākṣākṣoḍakṣīrekṣukṣaudragokṣurādau dravye satyapi mādhurye 'paro 'para āsvāda upalabhyate // (4) Par.?

evamamlānāmapi mātuluṅgadhānyāmlādīnāṃ dravyāṇāṃ nānāsvādopalambhaḥ // (5) Par.?

evaṃ lavaṇādīnāmapi vedyam // (6) Par.?

api caiṣāṃ drākṣādīnām anekarasatvam āsvādaviśeṣādanumīyamānaṃ bhūyasā rasenānyarasābhibhavaṃ kṛtvā vyapadiśyate idaṃ madhuram idam amlādyanyatamam mahābhūtavat // (7) Par.?

yathā sarvaṃ dravyaṃ pañcamahābhūtātmakaṃ bhūyasā mahābhūtenānyamahābhūtābhibhavaṃ kṛtvā yathā tena vyapadiśyate pārthivamidam āpyam idamiti // (8) Par.?

nanu dravyanirṇaye prakṛte pāñcabhautikaṃ yadeva dravyaṃ pratijñātaṃ tadeva tasmād ityādinā nigamagranthenātivāhayituṃ yuktam na punaraprastutam anekarasatvam // (9) Par.?

tasmādatraivaṃ granthaḥ kartuṃ nyāyyaḥ tasmān naikabhūtajaṃ dravyaṃ bhūtasaṃghātasambhavāt // (10) Par.?

iti // (11) Par.?

atrocyate / (12.1) Par.?

ṣaṇṇām api rasānāṃ yonirudakam // (12.2) Par.?

tataścaikasyaiva mahābhūtasyodakasaṃjñasya rasakāraṇatvaṃ prāptaṃ nānyeṣām nīrasatvāt // (13) Par.?

iti kṛtvā na bhūtasaṃghātasambhavatvaṃ rasasya // (14) Par.?

ity evaṃvidhām āśaṅkām apaninīṣur bhūtasaṃghātasambhavatvaṃ rasasya caikenaiva prayatnena tasmān naikarasaṃ dravyaṃ bhūtasaṃghātasambhavāt // (15) Par.?

iti jagāda / (16.1) Par.?

muniścāta eva rasasya bhūtasaṃghātasambhavatvaṃ spaṣṭaṃ kṛtvovāca // (16.2) Par.?

yathā rasanārtho rasastasya dravyamāpaḥ kṣitistathā // (17) Par.?

nirvṛttau ca viśeṣe ca pratyayāḥ khādayas trayaḥ // (18) Par.?

iti // (19) Par.?

evaṃ bhūtasaṃghāto rasānāṃ dravyāśritānāmapi sambhavakāraṇam // (20) Par.?

etacca rasabhedīye savistaraṃ kathayiṣyāmaḥ // (21) Par.?