Texts

pūrvārdhe pathyāṃ svastim agniṃ dakṣiṇārdhe 'parārdhe somam uttarārdhe savitāraṃ madhye 'ditiṃ yajet // (1) Par.?

aditim iṣṭvā maruto yaddha vo diva iti mārutīm ṛcam anvāha // (2) Par.?

śamyvantaḥ prāyaṇīyaḥ saṃtiṣṭhate // (3) Par.?

sthālīṃ sakṣāmakāṣām etan mekṣaṇam etad barhir etaṃ vedam udayanīyāya surakṣitaṃ nidadhāti // (4) Par.?

dhrauvam ājyaṃ dhārayati // (5) Par.?

tasmāj juhvām aṣṭau caturo vā gṛhītvā darbhanāḍyā hiraṇyaṃ niṣṭarkyaṃ pragrathya juhvām avadadhātīyaṃ te śukra tanūr iti // (6) Par.?

tad ājyaṃ jūr asi dhṛtā manasety āhavanīye 'nvārabdhe yajamāne nirūḍhapaśubandhalakṣaṇāṃ piṅgākṣīm ekahāyanīṃ somakrayaṇīm īkṣamāṇo juhoti // (7) Par.?

aparaṃ caturgṛhītaṃ gṛhītvā śukram asīti hiraṇyaṃ ghṛtād uddhṛtya surakṣitaṃ nidadhāti caturgṛhītaṃ ca // (8) Par.?

vaiśvadevaṃ havir ity ājyam abhimantrya sūryasya cakṣur aruham iti sahiraṇyena pāṇinādityam upatiṣṭhate // (9) Par.?

agreṇa śālāṃ pratyaṅmukhīm avasthāpya somakrayaṇīṃ cid asi manāsīti saṃśāsti // (10) Par.?

mitras tvā padi badhnātv iti dakṣiṇe pūrvapāde baddhvā pūṣādhvana iti yatra somas tatra gamayati // (11) Par.?

dakṣiṇena padā vasvy asi rudrāsītyādyair dakṣiṇāni ṣaṭ padāny anunikrāmati // (12) Par.?

ekam iṣe viṣṇus tvānvetv ity etair nikramyamāṇeṣu yajamāno 'nuvartayati // (13) Par.?

sakhāya iti saptamaṃ padam abhimantrayate // (14) Par.?

adhvaryur bṛhaspatis tvā sumne raṇvatv iti saptamaṃ padam abhigṛhṇāti // (15) Par.?

taddhiraṇyaṃ tasmin nidhāya paristīrya pṛthivyās tvā mūrdhann ājigharmīti tac caturgṛhītam abhijuhoti // (16) Par.?