Texts

punarbhavāya saṃskārān avidyānivṛtas tridhā / (1.1) Par.?

abhisaṃskurute yāṃs tair gatiṃ gacchati karmabhiḥ // (1.2) Par.?

vijñānaṃ saṃniviśate saṃskārapratyayaṃ gatau / (2.1) Par.?

saṃniviṣṭe 'tha vijñāne nāmarūpaṃ niṣicyate // (2.2) Par.?

niṣikte nāmarūpe tu ṣaḍāyatanasaṃbhavaḥ / (3.1) Par.?

ṣaḍāyatanam āgamya saṃsparśaḥ sampravartate // (3.2) Par.?

cakṣuḥ pratītya rūpaṃ ca samanvāhāram eva ca / (4.1) Par.?

nāmarūpaṃ pratītyaivaṃ vijñānaṃ sampravartate // (4.2) Par.?

saṃnipātas trayāṇāṃ yo rūpavijñānacakṣuṣām / (5.1) Par.?

sparśaḥ sa tasmāt sparśāc ca vedanā sampravartate // (5.2) Par.?

vedanāpratyayā tṛṣṇā vedanārthaṃ hi tṛṣyate / (6.1) Par.?

tṛṣyamāṇa upādānam upādatte caturvidham // (6.2) Par.?

upādāne sati bhava upādātuḥ pravartate / (7.1) Par.?

syāddhi yady anupādāno mucyeta na bhaved bhavaḥ // (7.2) Par.?

pañca skandhāḥ sa ca bhavo bhavāj jātiḥ pravartate / (8.1) Par.?

jarāmaraṇaduḥkhādiśokāḥ saparidevanāḥ // (8.2) Par.?

daurmanasyam upāyāsā jāter etat pravartate / (9.1) Par.?

kevalasyaivam etasya duḥkhaskandhasya saṃbhavaḥ // (9.2) Par.?

saṃsāramūlaṃ saṃskārān avidvān saṃskaroty ataḥ / (10.1) Par.?

avidvān kārakas tasmān na vidvāṃs tattvadarśanāt // (10.2) Par.?

avidyāyāṃ niruddhāyāṃ saṃskārāṇām asaṃbhavaḥ / (11.1) Par.?

avidyāyā nirodhas tu jñānasyāsyaiva bhāvanāt // (11.2) Par.?

tasya tasya nirodhena tat tan nābhipravartate / (12.1) Par.?

duḥkhaskandhaḥ kevalo 'yam evaṃ samyaṅ nirudhyate // (12.2) Par.?