Texts

abhyardho vai devebhyo yajña āsīt // (1) Par.?

te nāvidur iha vā sa iha veti // (2) Par.?

asti yajña iti tv aviduḥ // (3) Par.?

tena vai saṃsṛṣṭim aicchan // (4) Par.?

taṃ praiṣam aicchan // (5) Par.?

taṃ nāvindan // (6) Par.?

taṃ vayāṃsy uparyupari nātyapatan // (7) Par.?

tam indra uparyupary atyakrāmat // (8) Par.?

tam acāyat // (9) Par.?

so 'ved aciked vai meti // (10) Par.?

so 'bravīt ko 'sā iti // (11) Par.?

ahaṃ durge hanteti // (12) Par.?

atha kas tvam asīti // (13) Par.?

ahaṃ durgād āharteti // (14) Par.?

so 'bravīd durge vai hantāvocathāḥ // (15) Par.?

ayaṃ varāha emuṣa ekaviṃśatyāḥ purāṃ pāre 'śmamayīnām // (16) Par.?

tasminn asurāṇāṃ vasu vāmam antaḥ // (17) Par.?

taṃ jahīti // (18) Par.?

tasya vā indro druṃbhūlyābhyāyatya purastād bhittvā hṛdayaṃ prāvṛścat // (19) Par.?

etad vā eṣābhyanūktā // (20) Par.?

atividdhā vithureṇā cid astrā triḥ sapta sānu saṃhitā girīṇām // (21) Par.?

na tad devo na martyas tuturyād yāni pravṛddho vṛṣabhaś cakāreti // (22) Par.?

so 'bravīd durgād vā āhartāvocathāḥ // (23) Par.?

etam āhareti // (24) Par.?

taṃ vai viṣṇur āharat // (25) Par.?

yajño vai viṣṇuḥ // (26) Par.?

yajño vai tad yajñam asurebhyo 'dhy āharat // (27) Par.?

yajñena vai tad yajñaṃ devā asurāṇām avindanta // (28) Par.?

etad vā eṣābhyanūktā // (29) Par.?

viśvet tā viṣṇur ābharad urukramas tveṣitaḥ // (30) Par.?

śataṃ mahiṣān kṣīrapākam odanaṃ varāham indra emuṣam iti // (31) Par.?

tad vai devā yajñam avindan // (32) Par.?

yad vai tad yajñam avindaṃs tad devayajanasya devayajanatvam // (33) Par.?

yad devayajanam icchanti yajñam icchanti // (34) Par.?

yad vindanti yajñaṃ vindanti // (35) Par.?

yad vāva yajamāno joṣayate tad devayajanam // (36) Par.?

yajñaṃ vāvaitad yajamāno joṣayate // (37) Par.?

asurāṇāṃ vā iyam agra āsīt // (38) Par.?

yāvan niṣadya parāpaśyaṃs tad devānām // (39) Par.?

te devāḥ salāvṛkīm abruvan yāvad iyaṃ triḥ samantaṃ paryeti tad asmākam iti // (40) Par.?

sā vā imāṃ triḥ samantaṃ paryait tad vai devā imām avindanta // (41) Par.?

tad vedyā veditvam // (42) Par.?

viṣṇuṃ vai devā ānayan vāmanaṃ kṛtvā // (43) Par.?

yāvad ayaṃ trir vikramate tad asmākam iti // (44) Par.?

sa vā idam evāgre vyakramatāthedam athādaḥ // (45) Par.?

tad vai devā ihemām avindanta // (46) Par.?

tad vedyā veditvam // (47) Par.?

sarvā vā iyaṃ pṛthivī vediḥ // (48) Par.?

iyaṃ mekhalam iti tv evāsyā yajamānaḥ parigṛhṇīte // (49) Par.?

yāvadyāvad vai yajamāno vedyāḥ kurute tāvattāttāvattāt pṛthivyā jayati // (50) Par.?

tasmān mahatī kāryā jyāyasījyāyasī // (51) Par.?

devāś ca vā asurāś cāspardhanta // (52) Par.?

tad yat kiṃ cāsurāṇāṃ svam āsīt tad devā vedyāvindanta // (53) Par.?

tad vedyā veditvam // (54) Par.?

teṣāṃ yat priyaṃ vasv āsīt tenāpādhāvann anena cin mucyāmahā iti // (55) Par.?

tad devā uttaravedyāvindanta // (56) Par.?

tad uttaraṃ vai śreyo 'vidāmahīti // (57) Par.?

tad uttaravedyā uttaraveditvam // (58) Par.?

tad ya evaṃ vidvān vediṃ cottaravediṃ ca kurute 'bhipūrvam eva sapatnasya bhrātṛvyasya vasu vedo vṛñjāna eti // (59) Par.?