Texts

anitye kārye nityakhyātiḥ // (1.1) Par.?

tad yathā dhruvā pṛthivī dhruvā sacandratārakā dyauḥ amṛtā divaukasa iti // (2.1) Par.?

tathāśucau paramabībhatse kāye śucikhyātiḥ // (3.1) Par.?

uktaṃ ca // (4.1) Par.?

sthānād bījād upaṣṭambhān niḥsyandān nidhanād api // (5.1) Par.?

kāyam ādheyaśaucatvāt paṇḍitā hy aśuciṃ viduḥ // (6.1) Par.?

ityaśucau śucikhyātir dṛśyate // (7.1) Par.?

naveva śaśāṅkalekhā kamanīyeyaṃ kanyā madhvamṛtāvayavanirmiteva candraṃ bhittvā niḥsṛteva jñāyate nīlotpalapatrāyatākṣī hāvagarbhābhyāṃ locanābhyāṃ jīvalokam āśvāsayantīveti kasya kenābhisaṃbandhaḥ bhavati caivam aśucau śuciviparyāsapratyaya iti // (8.1) Par.?

etenāpuṇye puṇyapratyayas tathaivānarthe cārthapratyayo vyākhyātaḥ // (9.1) Par.?

tathā duḥkhe sukhakhyātiṃ vakṣyati // (10.1) Par.?

pariṇāmatāpasaṃskāraduḥkhair guṇavṛttivirodhācca duḥkham eva sarvaṃ vivekinaḥ iti // (11.1) Par.?

tatra sukhakhyātir avidyā // (12.1) Par.?

tathānātmany ātmakhyātir bāhyopakaraṇeṣu cetanācetaneṣu bhogādhiṣṭhāne vā śarīre puruṣopakaraṇe vā manasy anātmany ātmakhyātir iti // (13.1) Par.?

tathaitad atroktam // (14.1) Par.?

vyaktam avyaktaṃ vā sattvam ātmatvenābhipratītya tasya saṃpadam anunandaty ātmasaṃpadaṃ manvānas tasya vyāpadam anuśocaty ātmavyāpadaṃ manyamānaḥ sa sarvo 'pratibuddha iti // (15.1) Par.?

eṣā catuṣpadā bhavaty avidyā mūlam asya kleśasaṃtānasya karmāśayasya ca savipākasyeti // (16.1) Par.?

tasyāścāmitrāgoṣpadavad vastu satattvaṃ vijñeyam // (17.1) Par.?

yathā nāmitro mitrābhāvo na mitramātraṃ kiṃtu tadviruddhaḥ sapatnaḥ // (18.1) Par.?

tathāgoṣpadaṃ na goṣpadābhāvo na goṣpadamātraṃ kiṃtu deśa eva tābhyām anyad vastvantaram // (19.1) Par.?

evam avidyā na pramāṇaṃ na pramāṇābhāvaḥ kiṃtu vidyāviparītaṃ jñānāntaram avidyeti // (20.1) Par.?