Texts
Select a text:
Bibliography
Bibliography
Select a chapter:
1 revision
Show parallels Show headlines
Use dependency labeler
1 revision
Associated topic(s): Agni, Sacrifice, yajña
Show parallels Show headlines
Use dependency labeler
Chapter id: 9804
- Click on a sentence to show its analysis
- Keep the mouse pointer over a lemma to show its meanings.
ā no devānām upa vetu śaṃso viśvebhis turair avase yajatraḥ / (1.1) Par.?
tebhir vayaṃ suṣakhāyo bhavema taranto viśvā duritā syāma // (1.2) Par.?
pari cin marto draviṇam mamanyād ṛtasya pathā namasā vivāset / (2.1) Par.?
uta svena kratunā saṃ vadeta śreyāṃsaṃ dakṣam manasā jagṛbhyāt // (2.2) Par.?
adhāyi dhītir asasṛgram aṃśās tīrthe na dasmam upa yanty ūmāḥ / (3.1) Par.?
abhy ānaśma suvitasya śūṣaṃ navedaso amṛtānām abhūma // (3.2) Par.?
nityaś cākanyāt svapatir damūnā yasmā u devaḥ savitā jajāna / (4.1) Par.?
bhago vā gobhir aryamem anajyāt so asmai cāruś chadayad uta syāt // (4.2) Par.?
iyaṃ sā bhūyā uṣasām iva kṣā yaddha kṣumantaḥ śavasā samāyan / (5.1) Par.?
asya stutiṃ jaritur bhikṣamāṇā ā naḥ śagmāsa upa yantu vājāḥ // (5.2) Par.?
asyed eṣā sumatiḥ paprathānābhavat pūrvyā bhūmanā gauḥ / (6.1) Par.?
asya sanīḍā asurasya yonau samāna ā bharaṇe bibhramāṇāḥ // (6.2) Par.?
kiṃ svid vanaṃ ka u sa vṛkṣa āsa yato dyāvāpṛthivī niṣṭatakṣuḥ / (7.1) Par.?
saṃtasthāne ajare itaūtī ahāni pūrvīr uṣaso jaranta // (7.2) Par.?
naitāvad enā paro anyad asty ukṣā sa dyāvāpṛthivī bibharti / (8.1) Par.?
tvacam pavitraṃ kṛṇuta svadhāvān yad īṃ sūryaṃ na harito vahanti // (8.2) Par.?
stego na kṣām aty eti pṛthvīm mihaṃ na vāto vi ha vāti bhūma / (9.1) Par.?
mitro yatra varuṇo ajyamāno 'gnir vane na vy asṛṣṭa śokam // (9.2) Par.?
starīr yat sūta sadyo ajyamānā vyathir avyathīḥ kṛṇuta svagopā / (10.1) Par.?
putro yat pūrvaḥ pitror janiṣṭa śamyāṃ gaur jagāra yaddha pṛcchān // (10.2) Par.?
uta kaṇvaṃ nṛṣadaḥ putram āhur uta śyāvo dhanam ādatta vājī / (11.1) Par.?
pra kṛṣṇāya ruśad apinvatodhar ṛtam atra nakir asmā apīpet // (11.2) Par.?
Duration=0.077286005020142 secs.