Texts

śokād bhraṣṭasvaram api śrutvā te hariyūthapāḥ / (1.1) Par.?

śraddadhur naiva tad vākyaṃ karmaṇā tasya śaṅkitāḥ // (1.2) Par.?

te prāyam upaviṣṭās tu dṛṣṭvā gṛdhraṃ plavaṃgamāḥ / (2.1) Par.?

cakrur buddhiṃ tadā raudrāṃ sarvān no bhakṣayiṣyati // (2.2) Par.?

sarvathā prāyam āsīnān yadi no bhakṣayiṣyati / (3.1) Par.?

kṛtakṛtyā bhaviṣyāmaḥ kṣipraṃ siddhim ito gatāḥ // (3.2) Par.?

etāṃ buddhiṃ tataś cakruḥ sarve te vānararṣabhāḥ / (4.1) Par.?

avatārya gireḥ śṛṅgād gṛdhram āhāṅgadas tadā // (4.2) Par.?

babhūvarkṣarajā nāma vānarendraḥ pratāpavān / (5.1) Par.?

mamāryaḥ pārthivaḥ pakṣin dhārmikau tasya cātmajau // (5.2) Par.?

sugrīvaś caiva vālī ca putrāv oghabalāv ubhau / (6.1) Par.?

loke viśrutakarmābhūd rājā vālī pitā mama // (6.2) Par.?

rājā kṛtsnasya jagata ikṣvākūṇāṃ mahārathaḥ / (7.1) Par.?

rāmo dāśarathiḥ śrīmān praviṣṭo daṇḍakāvanam // (7.2) Par.?

lakṣmaṇena saha bhrātrā vaidehyā cāpi bhāryayā / (8.1) Par.?

pitur nideśanirato dharmyaṃ panthānam āśritaḥ / (8.2) Par.?

tasya bhāryā janasthānād rāvaṇena hṛtā balāt // (8.3) Par.?

rāmasya ca pitur mitraṃ jaṭāyur nāma gṛdhrarāṭ / (9.1) Par.?

dadarśa sītāṃ vaidehīṃ hriyamāṇāṃ vihāyasā // (9.2) Par.?

rāvaṇaṃ virathaṃ kṛtvā sthāpayitvā ca maithilīm / (10.1) Par.?

pariśrāntaś ca vṛddhaś ca rāvaṇena hato raṇe // (10.2) Par.?

evaṃ gṛdhro hatas tena rāvaṇena balīyasā / (11.1) Par.?

saṃskṛtaś cāpi rāmeṇa gataś ca gatim uttamām // (11.2) Par.?

tato mama pitṛvyeṇa sugrīveṇa mahātmanā / (12.1) Par.?

cakāra rāghavaḥ sakhyaṃ so 'vadhīt pitaraṃ mama // (12.2) Par.?

mama pitrā viruddho hi sugrīvaḥ sacivaiḥ saha / (13.1) Par.?

nihatya vālinaṃ rāmas tatas tam abhiṣecayat // (13.2) Par.?

sa rājye sthāpitas tena sugrīvo vānareśvaraḥ / (14.1) Par.?

rājā vānaramukhyānāṃ yena prasthāpitā vayam // (14.2) Par.?

evaṃ rāmaprayuktās tu mārgamāṇās tatas tataḥ / (15.1) Par.?

vaidehīṃ nādhigacchāmo rātrau sūryaprabhām iva // (15.2) Par.?

te vayaṃ daṇḍakāraṇyaṃ vicitya susamāhitāḥ / (16.1) Par.?

ajñānāt tu praviṣṭāḥ sma dharaṇyā vivṛtaṃ bilam // (16.2) Par.?

mayasya māyāvihitaṃ tad bilaṃ ca vicinvatām / (17.1) Par.?

vyatītas tatra no māso yo rājñā samayaḥ kṛtaḥ // (17.2) Par.?

te vayaṃ kapirājasya sarve vacanakāriṇaḥ / (18.1) Par.?

kṛtāṃ saṃsthām atikrāntā bhayāt prāyam upāsmahe // (18.2) Par.?

kruddhe tasmiṃs tu kākutsthe sugrīve ca salakṣmaṇe / (19.1) Par.?

gatānām api sarveṣāṃ tatra no nāsti jīvitam // (19.2) Par.?