Texts

bhagavān uvāca / (1.1) Par.?

yathā brūyānmahāprājño yathā brūyād vicakṣaṇaḥ / (1.2) Par.?

yathā vācyastvadvidhena suhṛdā madvidhaḥ suhṛt // (1.3) Par.?

dharmārthayuktaṃ tathyaṃ ca yathā tvayyupapadyate / (2.1) Par.?

tathā vacanam ukto 'smi tvayaitat pitṛmātṛvat // (2.2) Par.?

satyaṃ prāptaṃ ca yuktaṃ cāpyevam eva yathāttha mām / (3.1) Par.?

śṛṇuṣvāgamane hetuṃ vidurāvahito bhava // (3.2) Par.?

daurātmyaṃ dhārtarāṣṭrasya kṣatriyāṇāṃ ca vairitām / (4.1) Par.?

sarvam etad ahaṃ jānan kṣattaḥ prāpto 'dya kauravān // (4.2) Par.?

paryastāṃ pṛthivīṃ sarvāṃ sāśvāṃ sarathakuñjarām / (5.1) Par.?

yo mocayenmṛtyupāśāt prāpnuyād dharmam uttamam // (5.2) Par.?

dharmakāryaṃ yatañ śaktyā na cecchaknoti mānavaḥ / (6.1) Par.?

prāpto bhavati tat puṇyam atra me nāsti saṃśayaḥ // (6.2) Par.?

manasā cintayan pāpaṃ karmaṇā nābhirocayan / (7.1) Par.?

na prāpnoti phalaṃ tasya evaṃ dharmavido viduḥ // (7.2) Par.?

so 'haṃ yatiṣye praśamaṃ kṣattaḥ kartum amāyayā / (8.1) Par.?

kurūṇāṃ sṛñjayānāṃ ca saṃgrāme vinaśiṣyatām // (8.2) Par.?

seyam āpanmahāghorā kuruṣveva samutthitā / (9.1) Par.?

karṇaduryodhanakṛtā sarve hyete tadanvayāḥ // (9.2) Par.?

vyasanaiḥ kliśyamānaṃ hi yo mitraṃ nābhipadyate / (10.1) Par.?

anunīya yathāśakti taṃ nṛśaṃsaṃ vidur budhāḥ // (10.2) Par.?

ā keśagrahaṇānmitram akāryāt saṃnivartayan / (11.1) Par.?

avācyaḥ kasyacid bhavati kṛtayatno yathābalam // (11.2) Par.?

tat samarthaṃ śubhaṃ vākyaṃ dharmārthasahitaṃ hitam / (12.1) Par.?

dhārtarāṣṭraḥ sahāmātyo grahītuṃ vidurārhati // (12.2) Par.?

hitaṃ hi dhārtarāṣṭrāṇāṃ pāṇḍavānāṃ tathaiva ca / (13.1) Par.?

pṛthivyāṃ kṣatriyāṇāṃ ca yatiṣye 'ham amāyayā // (13.2) Par.?

hite prayatamānaṃ māṃ śaṅked duryodhano yadi / (14.1) Par.?

hṛdayasya ca me prītir ānṛṇyaṃ ca bhaviṣyati // (14.2) Par.?

jñātīnāṃ hi mitho bhede yanmitraṃ nābhipadyate / (15.1) Par.?

sarvayatnena madhyasthaṃ na tanmitraṃ vidur budhāḥ // (15.2) Par.?

na māṃ brūyur adharmajñā mūḍhā asuhṛdastathā / (16.1) Par.?

śakto nāvārayat kṛṣṇaḥ saṃrabdhān kurupāṇḍavān // (16.2) Par.?

ubhayoḥ sādhayann artham aham āgata ityuta / (17.1) Par.?

tatra yatnam ahaṃ kṛtvā gaccheyaṃ nṛṣvavācyatām // (17.2) Par.?

mama dharmārthayuktaṃ hi śrutvā vākyam anāmayam / (18.1) Par.?

na ced ādāsyate bālo diṣṭasya vaśam eṣyati // (18.2) Par.?

ahāpayan pāṇḍavārthaṃ yathāvacchamaṃ kurūṇāṃ yadi cācareyam / (19.1) Par.?

puṇyaṃ ca me syāccaritaṃ mahārthaṃ mucyeraṃśca kuravo mṛtyupāśāt // (19.2) Par.?

api vācaṃ bhāṣamāṇasya kāvyāṃ dharmārāmām arthavatīm ahiṃsrām / (20.1) Par.?

avekṣeran dhārtarāṣṭrāḥ samarthāṃ māṃ ca prāptaṃ kuravaḥ pūjayeyuḥ // (20.2) Par.?

na cāpi mama paryāptāḥ sahitāḥ sarvapārthivāḥ / (21.1) Par.?

kruddhasya pramukhe sthātuṃ siṃhasyevetare mṛgāḥ // (21.2) Par.?

vaiśaṃpāyana uvāca / (22.1) Par.?

ityevam uktvā vacanaṃ vṛṣṇīnām ṛṣabhastadā / (22.2) Par.?

śayane sukhasaṃsparśe śiśye yadusukhāvahaḥ // (22.3) Par.?