Texts

śrīmārkaṇḍeya uvāca / (1.1) Par.?

tataḥ puṣkariṇīṃ gacchet sarvapāpapraṇāśinīm / (1.2) Par.?

śrute yasyāḥ prabhāve tu sarvapāpaiḥ pramucyate // (1.3) Par.?

revāyā uttare kūle tīrthaṃ paramaśobhanam / (2.1) Par.?

yatrāste sarvadā devo vedamūrtirdivākaraḥ // (2.2) Par.?

kurukṣetraṃ yathā puṇyaṃ sārvakāmikamuttamam / (3.1) Par.?

idaṃ tīrthaṃ tathā puṇyaṃ sarvakāmaphalapradam // (3.2) Par.?

kurukṣetre yathā vṛddhirdānasya jagatīpate / (4.1) Par.?

puṣkariṇyāṃ tathā dānaṃ vardhate nātra saṃśayaḥ // (4.2) Par.?

yavamekaṃ tu yo dadyāt sauvarṇaṃ mastake nṛpa / (5.1) Par.?

puṣkariṇyāṃ tathā sthānaṃ yathā sthānaṃ nare smṛtam // (5.2) Par.?

sūryagrahe tu yaḥ snātvā dadyād dānaṃ yathāvidhi / (6.1) Par.?

hastyaśvaratharatnādi gṛhaṃ gāśca yugaṃdharān // (6.2) Par.?

suvarṇaṃ rajataṃ vāpi brāhmaṇebhyo dadāti yaḥ / (7.1) Par.?

trayodaśa dinaṃ yāvattrayodaśaguṇaṃ bhavet // (7.2) Par.?

tilamiśreṇa toyena tarpayet pitṛdevatāḥ / (8.1) Par.?

dvādaśābde bhavet prītistatra tīrthe mahīpate // (8.2) Par.?

yastatra kurute śrāddhaṃ pāyasair madhusarpiṣā / (9.1) Par.?

śrāddhado labhate svargaṃ pitṝṇāṃ dattam akṣayam // (9.2) Par.?

akṣatairbadarairbilvairiṅgudairvā tilaiḥ saha / (10.1) Par.?

akṣayaṃ phalamāpnoti tasmiṃstīrthe na saṃśayaḥ // (10.2) Par.?

tatra snātvā tu yo devaṃ pūjayec ca divākaram / (11.1) Par.?

ādityahṛdayaṃ japtvā punarādityam arcayet / (11.2) Par.?

sa gacchet paramaṃ lokaṃ tridaśairapi vanditam // (11.3) Par.?

ṛcamekāṃ japedyastu yajurvā sāma eva ca / (12.1) Par.?

sa samagrasya vedasya phalamāpnoti vai nṛpa // (12.2) Par.?

yastryakṣaraṃ japenmantraṃ dhyāyamāno divākaram / (13.1) Par.?

ādityahṛdayaṃ japtvā mucyate sarvapātakaiḥ // (13.2) Par.?

yastatra vidhivatprāṇāṃstyajate nṛpasattama / (14.1) Par.?

sa gacchetparamaṃ sthānaṃ yatra devo divākaraḥ // (14.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe puṣkariṇyām ādityatīrthamāhātmyavarṇanaṃ nāmaikonaṣaṣṭitamo 'dhyāyaḥ // (15.1) Par.?