Texts

śrīmārkaṇḍeya uvāca / (1.1) Par.?

tato gacchettu rājendra ānandeśvaramuttamam / (1.2) Par.?

tattīrthaṃ kathayiṣyāmi sarvapāpakṣayaṃkaram // (1.3) Par.?

yudhiṣṭhira uvāca / (2.1) Par.?

ānandaścaiva saṃjāto rudrasya dvijasattama / (2.2) Par.?

kathyatāṃ me ca tatsarvaṃ saṃkṣepātsaha bāndhavaiḥ // (2.3) Par.?

śrīmārkaṇḍeya uvāca / (3.1) Par.?

kathayāmi nṛpaśreṣṭha ānandeśvaramuttamam / (3.2) Par.?

dānavānāṃ vadhaṃ kṛtvā devadevo maheśvaraḥ // (3.3) Par.?

pūjito daivataiḥ sarvaiḥ kinnarairyakṣapannagaiḥ / (4.1) Par.?

ānandasaṃyuto devo nanarta vṛṣavāhanaḥ // (4.2) Par.?

bhairavaṃ rūpamāsthāya gauryā cārddhāṅgasaṃsthitaḥ / (5.1) Par.?

bhūtavetālakaṅkālair bhairavair bhairavo vṛtaḥ // (5.2) Par.?

nanarta narmadātīre dakṣiṇe pāṇḍunandana / (6.1) Par.?

tuṣṭairmarudgaṇaiḥ sarvaiḥ sthāpitaḥ kamalāsanaḥ // (6.2) Par.?

tadāprabhṛti tattīrtham ānandeśvaram ucyate / (7.1) Par.?

aṣṭamyāṃ ca caturdaśyāṃ paurṇamāsyāṃ narādhipa // (7.2) Par.?

vidhivaccārcayed devaṃ sugandhena vilepayet / (8.1) Par.?

brāhmaṇānpūjayettatra yathāśaktyā yudhiṣṭhira // (8.2) Par.?

godānaṃ tatra kartavyaṃ vastradānaṃ śubhāvaham / (9.1) Par.?

vasantasya trayodaśyāṃ śrāddhaṃ tatraiva kārayet // (9.2) Par.?

iṅgudair badarair bilvair akṣataiśca jalena vā / (10.1) Par.?

pretānāṃ kārayecchrāddhamānandeśvara uttame // (10.2) Par.?

ānanditā bhaveyuste yāvadābhūtasamplavam / (11.1) Par.?

santatervai na vicchedaḥ saptajanmasu jāyate / (11.2) Par.?

ānando hi bhavatteṣāṃ pratijanmani bhārata // (11.3) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ānandeśvaratīrthamāhātmyavarṇanaṃ nāma pañcaṣaṣṭitamo 'dhyāyaḥ // (12.1) Par.?