Texts

śrīmārkaṇḍeya uvāca / (1.1) Par.?

tato gacchenmahārāja sarpatīrthamanuttamam / (1.2) Par.?

yatra siddhā mahāsarpāstapastaptvā yudhiṣṭhira // (1.3) Par.?

vāsukistakṣako ghoraḥ sārpa airāvatastathā / (2.1) Par.?

kāliyaśca mahābhāgaḥ karkoṭakadhanaṃjayau // (2.2) Par.?

śaṅkhacūḍo mahātejā dhṛtarāṣṭro vṛkodaraḥ / (3.1) Par.?

kuliko vāmanaścaiva teṣāṃ ye putrapautriṇaḥ // (3.2) Par.?

tatra tīrthe mahāpuṇye tapastaptvā suduṣkaram / (4.1) Par.?

bhuñjanti vividhānbhogānkrīḍanti ca yathāsukham // (4.2) Par.?

tatra tīrthe tu yaḥ snātvā tarpayet pitṛdevatāḥ / (5.1) Par.?

vājapeyaphalaṃ tasya purā provāca śaṅkaraḥ // (5.2) Par.?

snātānāṃ sarpatīrthe tu narāṇāṃ bhuvi bhārata / (6.1) Par.?

sarpavṛścikajātibhyo na bhayaṃ vidyate kvacit // (6.2) Par.?

mṛto bhogavatīṃ gatvā pūjyamāno mahoragaiḥ / (7.1) Par.?

nāgakanyāparivṛto mahābhogapatirbhavet // (7.2) Par.?

mārgaśīrṣasya māsasya kṛṣṇapakṣe ca yāṣṭamī / (8.1) Par.?

sopavāsaḥ śucirbhūtvā liṅgaṃ sampūrayet tilaiḥ / (8.2) Par.?

yathāvibhavasāreṇa gandhapuṣpaiḥ samarcayet // (8.3) Par.?

evaṃ vidhāya vidhivatpraṇipatya kṣamāpayet / (9.1) Par.?

tasya yatphalamuddiṣṭaṃ tacchṛṇuṣva nareśvara // (9.2) Par.?

tilāstatra ca yatsaṃkhyāḥ patrapuṣpaphalāni ca / (10.1) Par.?

tāvat svargapure rājanmodate kālamīpsitam // (10.2) Par.?

tataḥ svargātparibhraṣṭo jāyate vimale kule / (11.1) Par.?

surūpaḥ subhagaścaiva dhanakoṭipatirbhavet // (11.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe sarpatīrthamāhātmyavarṇanaṃ nāmaikaṣaṣṭyuttaraśatatamo 'dhyāyaḥ // (12.1) Par.?