Texts

śrīmārkaṇḍeya uvāca / (1.1) Par.?

tato gacchettu rājendra tīrthaṃ paramaśobhanam / (1.2) Par.?

narmadādakṣiṇe kūle sarvapāpapraṇāśanam // (1.3) Par.?

siddheśvaramiti khyātaṃ mahāpātakanāśanam / (2.1) Par.?

yatra śuddhiṃ parāṃ prāpto devadevo maheśvaraḥ / (2.2) Par.?

purā hatyāyutaḥ pārtha devadevas triśūladhṛk // (2.3) Par.?

purā pañcaśirā āsīdbrahmā lokapitāmahaḥ / (3.1) Par.?

tenānṛtaṃ vacaścoktaṃ kasmiṃścitkāraṇāntare // (3.2) Par.?

tacchrutvā sahasā tasmai cukopa parameśvaraḥ / (4.1) Par.?

chedayāmāsa bhagavānmūrdhānaṃ karajaistadā // (4.2) Par.?

tasya tatkarasaṃlagnaṃ cyavate na kadācana / (5.1) Par.?

tato hi devadeveśaḥ paryaṭan pṛthivīmimām // (5.2) Par.?

tato vārāṇasīṃ prāptastasyāṃ tadapatacchiraḥ / (6.1) Par.?

patite tu kapāle ca brahmahatyā na muñcati // (6.2) Par.?

tatastu sāgare gatvā pūrve ca dakṣiṇe tathā / (7.1) Par.?

paścime cottare pārtha devadevo maheśvaraḥ // (7.2) Par.?

paryaṭansarvatīrtheṣu brahmahatyā na muñcati / (8.1) Par.?

narmadādakṣiṇe kūle sutīrthaṃ prāptavān prabhuḥ // (8.2) Par.?

kulakoṭiṃ samāsādya prārthayāmāsa cātmavān / (9.1) Par.?

prāyaścittaṃ tataḥ kṛtvā babhūva gatakalmaṣaḥ // (9.2) Par.?

tato niṣkalmaṣo jāto devadevo maheśvaraḥ / (10.1) Par.?

hatvā surebhyastatsthānaṃ tataścāntardadhe prabhuḥ // (10.2) Par.?

tadāprabhṛti tattīrthaṃ śuddharudreti kīrtitam / (11.1) Par.?

vikhyātaṃ triṣu loke brahmahatyāharaṃ param // (11.2) Par.?

māse māse site pakṣe 'māvāsyāyāṃ yudhiṣṭhira / (12.1) Par.?

snātvā tatra vidhānena tarpayet pitṛdevatāḥ // (12.2) Par.?

dadyāt piṇḍaṃ pitṝṇāṃ tu bhāvitenāntarātmanā / (13.1) Par.?

tasya te dvādaśābdāni sutṛptāḥ pitaro nṛpa // (13.2) Par.?

gandhadhūpapradīpādyairabhyarcya parameśvaram / (14.1) Par.?

śuddheśvarābhidhānaṃ tu śivaloke mahīyate // (14.2) Par.?

etatte kathitaṃ rājañchuddharudram anuttamam / (15.1) Par.?

mayā śrutaṃ yathā devasakāśācchūlapāṇinaḥ / (15.2) Par.?

mucyate sarvapāpebhyo rudralokaṃ sa gacchati // (15.3) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śuddheśvaratīrthamāhātmyavarṇanaṃ nāma trisaptatyuttaraśatatamo 'dhyāyaḥ // (16.1) Par.?