Texts

gheraṇḍa uvāca / (1.1) Par.?

athātaḥ sampravakṣyāmi pratyāhārakam uttamam / (1.2) Par.?

yasya vijñānamātreṇa kāmādiripunāśanam // (1.3) Par.?

yato yato niścarati manaś cañcalam asthiram / (2.1) Par.?

tatas tato niyamyaitad ātmany eva vaśaṃ nayet // (2.2) Par.?

yatra yatra gatā dṛṣṭir manas tatra pragacchati / (3.1) Par.?

tataḥ pratyāhared etad ātmany eva vaśaṃ nayet // (3.2) Par.?

puraskāraṃ tiraskāraṃ suśrāvyaṃ vā bhayānakam / (4.1) Par.?

manas tasmān niyamyaitad ātmanyeva vaśaṃ nayet // (4.2) Par.?

śītaṃ vāpi tathā coṣṇaṃ yan manaḥsparśayogataḥ / (5.1) Par.?

tasmāt pratyāhared etad ātmany eva vaśaṃ nayet // (5.2) Par.?

sugandhe vāpi durgandhe ghrāṇeṣu jāyate manaḥ / (6.1) Par.?

tasmāt pratyāhared etad ātmany eva vaśaṃ nayet // (6.2) Par.?

madhurāmlakatiktādirasaṃ gataṃ yadā manaḥ / (7.1) Par.?

tasmāt pratyāhared etad ātmany eva vaśaṃ nayet // (7.2) Par.?

śabdādiṣv anuraktāni nigṛhyākṣāṇi yogavit / (8.1) Par.?

kuryāc cittānucārīṇi pratyāhāraparāyaṇaḥ // (8.2) Par.?

vaśyatā paramā tena jāyate 'ticalātmanām / (9.1) Par.?

indriyāṇām avaśyais tair na yogī yogasādhakaḥ // (9.2) Par.?

prāṇāyāmair dahed doṣān dhāraṇābhiś ca kilbiṣam / (10.1) Par.?

pratyāhāreṇa viṣayān dhyānenānīśvarān guṇān // (10.2) Par.?

yathā parvatadhātūnāṃ doṣā dahyanti dhāmyatām / (11.1) Par.?

tathendriyakṛtā doṣā dahyante prāṇanigrahāt // (11.2) Par.?

samaḥ samāsano bhūtvā saṃhṛtya caraṇāv ubhau / (12.1) Par.?

saṃvṛtāsyas tathaivorū samyag viṣṭabhya cāgrataḥ // (12.2) Par.?

pārṣṇibhyāṃ liṅgavṛṣaṇāv aspṛśan prayataḥ sthitaḥ / (13.1) Par.?

kiṃcid unnāmitaśirā dantair dantān na saṃspṛśet / (13.2) Par.?

saṃpaśyan nāsikāgraṃ svaṃ diśaś cānavalokayan // (13.3) Par.?

rajasā tamaso vṛttiṃ sattvena rajasas tathā / (14.1) Par.?

saṃchādya nirmale sattve sthito yuñjīta yogavit // (14.2) Par.?

indriyāṇīndriyārthebhyaḥ prāṇādīn mana eva ca / (15.1) Par.?

nigṛhya samavāyena pratyāhāram upakramet // (15.2) Par.?

yas tu pratyāharet kāmān sarvāṅgān iva kacchapaḥ / (16.1) Par.?

sadātmaratir ekasthaḥ paśyaty ātmānam ātmani // (16.2) Par.?

sa bāhyābhyantaraṃ śaucaṃ niṣpādyākaṇṭhanābhitaḥ / (17.1) Par.?

pūrayitvā budho dehaṃ pratyāhāram upakramet // (17.2) Par.?

tathā vai yogayuktasya yogino niyatātmanaḥ / (18.1) Par.?

sarve doṣāḥ praṇaśyanti svasthaś caivopajāyate // (18.2) Par.?