Texts

vasantam ṛtūnāṃ prīṇāmi sa mā prītaḥ prīṇātu / (1.1) Par.?

vasantasyāhaṃ devayajyayā tejasvān payasvān bhūyāsam / (1.2) Par.?

grīṣmam ṛtūnāṃ prīṇāmi sa mā prītaḥ prīṇātu / (1.3) Par.?

grīṣmasyāhaṃ devayajyayendriyavān vīryavān bhūyāsam / (1.4) Par.?

varṣā ṛtūnāṃ prīṇāmi tā mā prītāḥ prīṇantu / (1.5) Par.?

varṣāṇām ahaṃ devayajyayā puṣṭimān paśumān bhūyāsam / (1.6) Par.?

śarad ṛtūnāṃ prīṇāmi sā mā prītā prīṇātu / (1.7) Par.?

śarado 'haṃ devayajyayānnavān varcasvān bhūyāsam / (1.8) Par.?

hemantaśiśirāv ṛtūnāṃ prīṇāmi tau mā prītau prīṇītām / (1.9) Par.?

hemantaśiśirayor ahaṃ devayajyayā sahasvāṃs tapasvān bhūyāsam / (1.10) Par.?

iti prayājān // (1.11) Par.?

agninā yajñaś cakṣuṣmān agner ahaṃ devayajyayā cakṣuṣā cakṣuṣmān bhūyāsam / (2.1) Par.?

somena yajñaś cakṣuṣmān somasyāhaṃ devayajyayā cakṣuṣā cakṣuṣmān bhūyāsam / (2.2) Par.?

ityājyabhāgau // (2.3) Par.?

agnir hoteti pañcahotāraṃ purastāddhaviṣām // (3.1) Par.?

agnirannādo 'gner ahaṃ devayajyayānnādo bhūyāsam / (4.1) Par.?

dabdhir nāmāsy adabdho 'haṃ bhrātṛvyaṃ dabheyam / (4.2) Par.?

ity upāṃśuyājau // (4.3) Par.?

agnīṣomau vṛtrahaṇā agnīṣomayor ahaṃ devayajyayā vṛtrahā bhūyāsam / (5.1) Par.?

indrāgnyor ahaṃ devayajyayendriyavān annādo bhūyāsam / (5.2) Par.?

indrasyāhaṃ devayajyayendriyavān bhūyāsam / (5.3) Par.?

mahendrasyāhaṃ devayajyayā jemānaṃ mahimānaṃ gameyam / (5.4) Par.?

ity auttaratanikān apy anumantrān adhīyeta // (5.5) Par.?

indrasya vaimṛdhasyāhaṃ devayajyayāsapatno bhūyāsam / (6.1) Par.?

indrasya trātur ahaṃ devayajyayā trātā bhūyāsam / (6.2) Par.?

pūṣṇo 'haṃ devayajyayā puṣṭimān paśumān bhūyāsam / (6.3) Par.?

sarasvatyā ahaṃ devayajyayā vācam annādyaṃ gameyam / (6.4) Par.?

aditer ahaṃ devayajyayā pra prajayā paśubhir janiṣīya / (6.5) Par.?

viśveṣāṃ devānām ahaṃ devayajyayā prāṇaiḥ sāyujyaṃ gameyam / (6.6) Par.?

dyāvāpṛthivyor ahaṃ devayajyayā pra janiṣīya prajayā paśubhiḥ / (6.7) Par.?

amuṣyāhaṃ devayajyayety anāmnāte 'bhyūhet // (6.8) Par.?

agniḥ sviṣṭakṛd yajñasya pratiṣṭhā tasyāhaṃ devayajyayā yajñena pratiṣṭhāṃ gameyam ity agniṃ sviṣṭakṛtam // (7.1) Par.?

agnir mā duriṣṭāt pātu savitāghaśaṃsād yo no anti śapati tam etena jeṣam iti prāśitram avadīyamānam // (8.1) Par.?

iḍāyās tūṣṇīm // (9.1) Par.?

upahave vasīyasyehīti / (10.1) Par.?

cid asīty uccaiḥ / (10.2) Par.?

ghṛtena mā samukṣatety antam / (10.3) Par.?

asmāsv indra iti ca // (10.4) Par.?

māśiṣa iti nāmagrāhe // (11.1) Par.?

iḍā dhenuḥ sahavatsā na āgād ūrjaṃ duhānā payasā prapīnā / (12.1) Par.?

sā no annena haviṣota gobhir iḍā pinvatāṃ payasābhyasmān / (12.2) Par.?

itīḍām ārjane // (12.3) Par.?

bradhna pāhīti barhiṣi havīṃṣy āsannāny abhimṛśet // (13.1) Par.?

āgneyaṃ caturdhā vyuddiśet idam agnīdha idaṃ brahmaṇa idaṃ hotur idam adhvaryor iti / (14.1) Par.?

idaṃ yajamānasyeti yajamānabhāgam // (14.2) Par.?

diśāṃ kﾱptir asi diśaḥ prīṇāmi diśo mā prītā avantv iti vyuddiṣṭe dakṣiṇāṃ dadāti // (15.1) Par.?

dakṣiṇāgnau yajamāno mantrāntam odanaṃ paktvā dakṣiṇasyāṃ vediśroṇyām āsādyābhimṛśet / (16.1) Par.?

iyaṃ sthāly amṛtasya pūrṇā sahasradhāra utso akṣīyamāṇaḥ / (16.2) Par.?

anenaudanenāti mṛtyuṃ tarāmy aham / (16.3) Par.?

prajāpater bhāgo 'sy ūrjasvān payasvān / (16.4) Par.?

akṣito 'sy akṣityai tvā / (16.5) Par.?

akṣito nāmāsi mā me kṣeṣṭhā ā mā gamyāḥ / (16.6) Par.?

prāṇāpānau me pāhi samānavyānau me pāhy udānarūpe me pāhi cakṣuḥśrotre me pāhi / (16.7) Par.?

ūrg asy ūrjaṃ mayi dhehi / (16.8) Par.?

prajāpatir ahaṃ tvayā sākṣād ṛdhyāsam iti // (16.9) Par.?

agreṇottaram udañcam udvāsya dakṣiṇataḥ sadbhya ṛtvigbhyaḥ parihṛtyādadhyāt // (17.1) Par.?

saṃ me saṃnatayaḥ saṃnamantām idhmasaṃnahane huta iti saṃmārgān āhitān // (18.1) Par.?

mahāhavir hoteti saptahotāraṃ purastād anuyājānām // (19.1) Par.?