Texts

janakena samādiṣṭā dūtās te klāntavāhanāḥ / (1.1) Par.?

trirātram uṣitvā mārge te 'yodhyāṃ prāviśan purīm // (1.2) Par.?

te rājavacanād dūtā rājaveśmapraveśitāḥ / (2.1) Par.?

dadṛśur devasaṃkāśaṃ vṛddhaṃ daśarathaṃ nṛpam // (2.2) Par.?

baddhāñjalipuṭāḥ sarve dūtā vigatasādhvasāḥ / (3.1) Par.?

rājānaṃ prayatā vākyam abruvan madhurākṣaram // (3.2) Par.?

maithilo janako rājā sāgnihotrapuraskṛtaḥ / (4.1) Par.?

kuśalaṃ cāvyayaṃ caiva sopādhyāyapurohitam // (4.2) Par.?

muhur muhur madhurayā snehasaṃyuktayā girā / (5.1) Par.?

janakas tvāṃ mahārāja pṛcchate sapuraḥsaram // (5.2) Par.?

pṛṣṭvā kuśalam avyagraṃ vaideho mithilādhipaḥ / (6.1) Par.?

kauśikānumate vākyaṃ bhavantam idam abravīt // (6.2) Par.?

pūrvaṃ pratijñā viditā vīryaśulkā mamātmajā / (7.1) Par.?

rājānaś ca kṛtāmarṣā nirvīryā vimukhīkṛtāḥ // (7.2) Par.?

seyaṃ mama sutā rājan viśvāmitrapuraḥsaraiḥ / (8.1) Par.?

yadṛcchayāgatair vīrair nirjitā tava putrakaiḥ // (8.2) Par.?

tac ca rājan dhanur divyaṃ madhye bhagnaṃ mahātmanā / (9.1) Par.?

rāmeṇa hi mahārāja mahatyāṃ janasaṃsadi // (9.2) Par.?

asmai deyā mayā sītā vīryaśulkā mahātmane / (10.1) Par.?

pratijñāṃ tartum icchāmi tad anujñātum arhasi // (10.2) Par.?

sopādhyāyo mahārāja purohitapuraskṛtaḥ / (11.1) Par.?

śīghram āgaccha bhadraṃ te draṣṭum arhasi rāghavau // (11.2) Par.?

prītiṃ ca mama rājendra nirvartayitum arhasi / (12.1) Par.?

putrayor ubhayor eva prītiṃ tvam api lapsyase // (12.2) Par.?

evaṃ videhādhipatir madhuraṃ vākyam abravīt / (13.1) Par.?

viśvāmitrābhyanujñātaḥ śatānandamate sthitaḥ // (13.2) Par.?

dūtavākyaṃ tu tac chrutvā rājā paramaharṣitaḥ / (14.1) Par.?

vasiṣṭhaṃ vāmadevaṃ ca mantriṇo 'nyāṃś ca so 'bravīt // (14.2) Par.?

guptaḥ kuśikaputreṇa kausalyānandavardhanaḥ / (15.1) Par.?

lakṣmaṇena saha bhrātrā videheṣu vasaty asau // (15.2) Par.?

dṛṣṭavīryas tu kākutstho janakena mahātmanā / (16.1) Par.?

sampradānaṃ sutāyās tu rāghave kartum icchati // (16.2) Par.?

yadi vo rocate vṛttaṃ janakasya mahātmanaḥ / (17.1) Par.?

purīṃ gacchāmahe śīghraṃ mā bhūt kālasya paryayaḥ // (17.2) Par.?

mantriṇo bāḍham ity āhuḥ saha sarvair maharṣibhiḥ / (18.1) Par.?

suprītaś cābravīd rājā śvo yātreti sa mantriṇaḥ // (18.2) Par.?

mantriṇas tu narendrasya rātriṃ paramasatkṛtāḥ / (19.1) Par.?

ūṣuḥ pramuditāḥ sarve guṇaiḥ sarvaiḥ samanvitāḥ // (19.2) Par.?