Texts

rājā sarvasyeṣṭe brāhmaṇavarjam // (1.1) Par.?

sādhukārī sādhuvādī // (2.1) Par.?

trayyām ānvīkṣikyā vābhivinītaḥ // (3.1) Par.?

śucir jitendriyo guṇavatsahāyopāyasampannaḥ // (4.1) Par.?

samaḥ prajāsu syāt // (5.1) Par.?

hitam āsāṃ kurvīta // (6.1) Par.?

tam uparyāsīnam adhastād upāsīrann anye brāhmaṇebhyaḥ // (7.1) Par.?

te 'pyenaṃ manyeran // (8.1) Par.?

varṇān āśramāṃś ca nyāyato 'bhirakṣet // (9.1) Par.?

calataś caitān svadharme sthāpayet // (10.1) Par.?

dharmasya hyaṃśabhāg bhavatīti // (11.1) Par.?

brāhmaṇaṃ ca purodadhīta vidyābhijanavāgrūpavayaḥśīlasampannaṃ nyāyavṛttaṃ tapasvinam // (12.1) Par.?

tatprasūtaḥ karmāṇi kurvīta // (13.1) Par.?

brahmaprasūtaṃ hi kṣatram ṛdhyate na vyathata iti ca vijñāyate // (14.1) Par.?

yāni ca daivotpātacintakāḥ prabrūyus tānyādriyeta // (15.1) Par.?

tadadhīnam api hyeke yogakṣemaṃ pratijānate // (16.1) Par.?

śāntipuṇyāhasvastyayanāyuṣmanmaṅgalasaṃyuktāny ābhyudayikāni vidveṣaṇasaṃvananābhicāradviṣadvyṛddhiyuktāni ca śālāgnau kuryāt // (17.1) Par.?

yathoktam ṛtvijo 'nyāni // (18.1) Par.?

tasya ca vyavahāro vedo dharmaśāstrāṇy aṅgānyupavedāḥ purāṇam // (19.1) Par.?

deśajātikuladharmāś cāmnāyair aviruddhāḥ pramāṇam // (20.1) Par.?

karṣakavaṇikpaśupālakusīdikāravaḥ sve sve varge // (21.1) Par.?

tebhyo yathādhikāram arthān pratyavahṛtya dharmavyavasthā // (22.1) Par.?

nyāyādhigame tarko 'bhyupāyaḥ // (23.1) Par.?

tenābhyūhya yathāsthānaṃ gamayet // (24.1) Par.?

vipratipattau traividyavṛddhebhyaḥ pratyavahṛtya niṣṭhāṃ gamayet // (25.1) Par.?

tathā hyasya niḥśreyasaṃ bhavati // (26.1) Par.?

brahma kṣatreṇa saṃpṛktaṃ devapitṛmanuṣyāndhārayatīti vijñāyate // (27.1) Par.?

daṇḍo damanād ityāhus tenādāntān damayet // (28.1) Par.?

varṇāśramāḥ svasvadharmaniṣṭhāḥ pretya karmaphalamanubhūya tataḥ śeṣena viśiṣṭadeśajātikularūpāyuḥśrutacitravittasukhamedhaso janma pratipadyante // (29.1) Par.?

viṣvañco viparītā naśyanti // (30.1) Par.?

tān ācāryopadeśo daṇḍaś ca pālayate // (31.1) Par.?

tasmād rājācāryāv anindyāv anindyau // (32.1) Par.?