Texts

rudra uvāca / (1.1) Par.?

punardhyānaṃ samācakṣva śaṅkhacakragadādhara / (1.2) Par.?

viṣṇorīśasya devasya śuddhasya paramātmanaḥ // (1.3) Par.?

hariruvāca / (2.1) Par.?

śṛṇu rudra harerdhyānaṃ saṃsāratarunāśanam / (2.2) Par.?

dṛśirūpamanantaṃ ca sarvavyāpy ajam avyayam // (2.3) Par.?

akṣaraṃ sarvagaṃ nityaṃ mahadbrahmāsti kevalam / (3.1) Par.?

sarvasya jagato mūlaṃ sarvagaṃ parameśvaram // (3.2) Par.?

sarvabhūtahṛdisthaṃ vai sarvabhūtamaheśvaram / (4.1) Par.?

sarvādhāraṃ nirādhāraṃ sarvakāraṇakāraṇam // (4.2) Par.?

alepakaṃ tathā muktaṃ muktayogivicintitam / (5.1) Par.?

sthūladehavihīnaṃ ca cakṣuṣā parivarjitam // (5.2) Par.?

vāgindriyavihīnaṃ ca prāṇidharmavivarjitam / (6.1) Par.?

pādendriyavihīnaṃ ca vāgdharmaparivarjitam / (6.2) Par.?

pāyūpasthavihīnaṃ ca sarvaindriyavivarjitam // (6.3) Par.?

manovirahitaṃ tadvanmanodharmavivarjitam / (7.1) Par.?

buddhyā vihīnaṃ deveśaṃ cetasā parivarjitam // (7.2) Par.?

ahaṅkāravihīnaṃ vai buddhidharmavivarjitam / (8.1) Par.?

prāṇena rahitaṃ caiva hyapānena vivarjitam // (8.2) Par.?

vyānākhyavāyuhīnaṃ vai prāṇadharmavivarjitam / (9.1) Par.?

hariruvāca / (9.2) Par.?

punaḥ sūryarcanaṃ vakṣye yaduktaṃ bhṛgave purā // (9.3) Par.?

oṃ khakholkāya namaḥ / (10.1) Par.?

sūryasya mūlamantro 'yaṃ bhuktimuktipradāyakaḥ // (10.2) Par.?

oṃ khakholkāya tridaśāya namaḥ / (11.1) Par.?

oṃ vici ṭhaṭha śirase namaḥ / (11.2) Par.?

oṃ jñānine ṭhaṭha śikhāyai namaḥ / (11.3) Par.?

oṃ sahasraraśmaye ṭhaṭha kavacāya namaḥ // (11.4) Par.?

oṃ sarvatejo'dhipataye ṭhaṭha astrāya namaḥ / (12.1) Par.?

oṃ jvala jvala prajvala prajvala ṭhaṭha namaḥ // (12.2) Par.?

agniprākāramantro 'yaṃ sūryasyāghavināśanaḥ / (13.1) Par.?

oṃ ādityāya vidmahe viśvabhāvāya dhīmahi tannaḥ sūrya pracodayāt // (13.2) Par.?

sakalīkaraṇaṃ kuryād gāyatryā bhāskarasya ca / (14.1) Par.?

dharmātmane ca pūrvasminyamāyeti ca dakṣiṇe // (14.2) Par.?

daṇḍanāyakāya tato daivatāyeti cottare / (15.1) Par.?

śyāmapiṅgalamaiśānyāmāgneyyāṃ dīkṣitaṃ yajet // (15.2) Par.?

vajrapāṇiṃ ca nairṛtyāṃ bhūr bhuvaḥ svaśca vāyave / (16.1) Par.?

oṃ candrāya nakṣatrādhipataye namaḥ / (16.2) Par.?

oṃ aṅgārakāya kṣitisutāya namaḥ / (16.3) Par.?

oṃ budhāya somasutāya namaḥ / (16.4) Par.?

oṃ vāgīśvarāya sarvavidyādhipataye namaḥ / (16.5) Par.?

oṃ śukrāya maharṣaye bhṛgusutāya namaḥ / (16.6) Par.?

oṃ śanaiścarāya sūryātmajāya namaḥ / (16.7) Par.?

oṃ rāhave namaḥ / (16.8) Par.?

oṃ ketave namaḥ // (16.9) Par.?

pūrvādīśānaparyantā ete pūjyā vṛṣadhvaja / (17.1) Par.?

oṃ anūkāya namaḥ / (17.2) Par.?

oṃ prathamanāthāya namaḥ / (17.3) Par.?

oṃ buddhāya namaḥ // (17.4) Par.?

oṃ bhagavannaparimitamayūkhamālin sakalajagatpate saptāśvavāhana caturbhuja paramasiddhiprada visphuliṅgapiṅgala tata ehyehi idamarghyaṃ mama śirasi gataṃ gṛhṇa gṛhṇa tejograrūpam anagna jvala jvala ṭhaṭha namaḥ // (18.1) Par.?

anenāvāhya mantreṇa tataḥ sūryaṃ visarjayet / (19.1) Par.?

oṃ namo bhagavate ādityāya sahasrakiraṇāya gaccha sukhaṃ punarāgamanāyeti // (19.2) Par.?

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe haridhyānasūryārcanayornirūpaṇaṃ nāma ṣoḍaśo 'dhyāyaḥ // (20.1) Par.?