Texts

sūta uvāca / (1.1) Par.?

tatraiva siṃhalavadhūkarapallavāgravyālūnabālalavalīkusumapravāle / (1.2) Par.?

deśe papāta ditijasya nitāntakāntaṃ protphullanīrajasamadyuti netrayugmam // (1.3) Par.?

tatpratyayād ubhayaśobhanavīcibhāsā vistāriṇī jalanidher upakacchabhūmiḥ / (2.1) Par.?

prodbhinnaketakavanapratibaddhalekhāsāndrendranīlamaṇiratnavatī vibhāti // (2.2) Par.?

tatrāsitābjahalabhṛdvasanāsibhṛṅgaśārṅgāyudhāṅgaharakaṇṭhakaṣāyapuṣpaiḥ / (3.1) Par.?

śuṣketaraiśca kusumair girikarṇikāyās tasmādbhavanti maṇayaḥ sadṛśāvabhāsaḥ // (3.2) Par.?

anye prasannapayasaḥ payasāṃ nidhāturambutviṣaḥ śikhigaṇapratimāstathānye / (4.1) Par.?

nīlīrasaprabhavabudbudabhāśca kecitkecittathā samadakokilakaṇṭhabhāsaḥ // (4.2) Par.?

ekaprakārā vispaṣṭavarṇaśobhāvabhāsinaḥ / (5.1) Par.?

jāyante maṇayastasmin indranīlā mahāguṇāḥ // (5.2) Par.?

mṛtpāṣāṇaśilārandhrakarkarātrāsasaṃyutāḥ / (6.1) Par.?

abhrikāpaṭalachāyāvarṇadoṣaiś ca dūṣitāḥ // (6.2) Par.?

tata eva hi jāyante maṇayastatra bhūrayaḥ / (7.1) Par.?

sāstrasaṃbodhitadhiyas tān praśaṃsanti sūrayaḥ // (7.2) Par.?

dhāryamāṇasya ye dṛṣṭāḥ padmarāgamaṇerguṇāḥ / (8.1) Par.?

dhāraṇādindranīlasya tānevāpnoti mānavaḥ // (8.2) Par.?

yathā ca padmarāgāṇāṃ jātakatritayaṃ bhavet / (9.1) Par.?

indranīleṣvapi tathā draṣṭavyamaviśeṣataḥ // (9.2) Par.?

parīkṣāpratyayairyaiśca padmarāgaḥ parīkṣyate / (10.1) Par.?

ta eva pratyayā dṛṣṭā indranīlamaṇerapi // (10.2) Par.?

yāvantaṃ ca kramedagniṃ padmarāgopayogataḥ / (11.1) Par.?

indranīlamaṇistasmātkrameta sumahattaram // (11.2) Par.?

tathāpi na parīkṣārthaṃ guṇānām abhivṛddhaye / (12.1) Par.?

maṇiragnau samādheyaḥ kathañcidapi kaścana // (12.2) Par.?

agnimātrāparijñāne dāhadoṣaiśca dūṣitaḥ / (13.1) Par.?

so 'narthāya bhavedbhartuḥ kartuḥ kārayitustathā // (13.2) Par.?

kācotpalakaravīrasphaṭikādyā iha budhaiḥ savaidūryāḥ / (14.1) Par.?

kathitā vijātaya ime sadṛśā maṇinendranīlena // (14.2) Par.?

gurubhāvakaṭhinabhāvāv eteṣāṃ nityameva vijñeyau / (15.1) Par.?

kācād yathāvad uttaravivardhamānau viśeṣeṇa // (15.2) Par.?

indranīlo yathā kaścid bibhartyātāmravarṇatām / (16.1) Par.?

rakṣaṇayau tathā tāmrau karavīrotpalāvubhau // (16.2) Par.?

yasya madhyagatā bhāti nīlasyendrāyudhaprabhā / (17.1) Par.?

tamindranīlamityāhurmahārhaṃ bhuvi durlabham // (17.2) Par.?

yasya varṇasya bhūyastvātkṣīre śataguṇe sthitaḥ / (18.1) Par.?

nīlatāṃ tannayetsarvaṃ mahānīlaḥ sa ucyate // (18.2) Par.?

yatpadmarāgasya mahāguṇasya mūlyaṃ bhavenmāṣasamunmitasya / (19.1) Par.?

tadindranīlasya mahāguṇasya suvarṇasaṃkhyātulitasya mūlyam // (19.2) Par.?

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe indranīlaparīkṣaṇaṃ nāma dvisaptatitamo 'dhyāyaḥ // (20.1) Par.?