Texts

yan na indro jujuṣe yac ca vaṣṭi tan no mahān karati śuṣmy ā cit / (1.1) Par.?

brahma stomam maghavā somam ukthā yo aśmānaṃ śavasā bibhrad eti // (1.2) Par.?

vṛṣā vṛṣandhiṃ caturaśrim asyann ugro bāhubhyāṃ nṛtamaḥ śacīvān / (2.1) Par.?

śriye paruṣṇīm uṣamāṇa ūrṇāṃ yasyāḥ parvāṇi sakhyāya vivye // (2.2) Par.?

yo devo devatamo jāyamāno maho vājebhir mahadbhiś ca śuṣmaiḥ / (3.1) Par.?

dadhāno vajram bāhvor uśantaṃ dyām amena rejayat pra bhūma // (3.2) Par.?

viśvā rodhāṃsi pravataś ca pūrvīr dyaur ṛṣvāj janiman rejata kṣāḥ / (4.1) Par.?

ā mātarā bharati śuṣmy ā gor nṛvat parijman nonuvanta vātāḥ // (4.2) Par.?

tā tū ta indra mahato mahāni viśveṣv it savaneṣu pravācyā / (5.1) Par.?

yacchūra dhṛṣṇo dhṛṣatā dadhṛṣvān ahiṃ vajreṇa śavasāviveṣīḥ // (5.2) Par.?

tā tū te satyā tuvinṛmṇa viśvā pra dhenavaḥ sisrate vṛṣṇa ūdhnaḥ / (6.1) Par.?

adhā ha tvad vṛṣamaṇo bhiyānāḥ pra sindhavo javasā cakramanta // (6.2) Par.?

atrāha te harivas tā u devīr avobhir indra stavanta svasāraḥ / (7.1) Par.?

yat sīm anu pra muco badbadhānā dīrghām anu prasitiṃ syandayadhyai // (7.2) Par.?

pipīﾱe aṃśur madyo na sindhur ā tvā śamī śaśamānasya śaktiḥ / (8.1) Par.?

asmadryak chuśucānasya yamyā āśur na raśmiṃ tuvyojasaṃ goḥ // (8.2) Par.?

asme varṣiṣṭhā kṛṇuhi jyeṣṭhā nṛmṇāni satrā sahure sahāṃsi / (9.1) Par.?

asmabhyaṃ vṛtrā suhanāni randhi jahi vadhar vanuṣo martyasya // (9.2) Par.?

asmākam it su śṛṇuhi tvam indrāsmabhyaṃ citrāṁ upa māhi vājān / (10.1) Par.?

asmabhyaṃ viśvā iṣaṇaḥ purandhīr asmākaṃ su maghavan bodhi godāḥ // (10.2) Par.?

nū ṣṭuta indra nū gṛṇāna iṣaṃ jaritre nadyo na pīpeḥ / (11.1) Par.?

akāri te harivo brahma navyaṃ dhiyā syāma rathyaḥ sadāsāḥ // (11.2) Par.?