Texts

indraḥ pūrbhid ātirad dāsam arkair vidadvasur dayamāno vi śatrūn / (1.1) Par.?

brahmajūtas tanvā vāvṛdhāno bhūridātra āpṛṇad rodasī ubhe // (1.2) Par.?

makhasya te taviṣasya pra jūtim iyarmi vācam amṛtāya bhūṣan / (2.1) Par.?

indra kṣitīnām asi mānuṣīṇāṃ viśāṃ daivīnām uta pūrvayāvā // (2.2) Par.?

indro vṛtram avṛṇocchardhanītiḥ pra māyinām aminād varpaṇītiḥ / (3.1) Par.?

ahan vyaṃsam uśadhag vaneṣv āvir dhenā akṛṇod rāmyāṇām // (3.2) Par.?

indraḥ svarṣā janayann ahāni jigāyośigbhiḥ pṛtanā abhiṣṭiḥ / (4.1) Par.?

prārocayan manave ketum ahnām avindaj jyotir bṛhate raṇāya // (4.2) Par.?

indras tujo barhaṇā ā viveśa nṛvad dadhāno naryā purūṇi / (5.1) Par.?

acetayad dhiya imā jaritre premaṃ varṇam atiracchukram āsām // (5.2) Par.?

maho mahāni panayanty asyendrasya karma sukṛtā purūṇi / (6.1) Par.?

vṛjanena vṛjinān sam pipeṣa māyābhir dasyūṃr abhibhūtyojāḥ // (6.2) Par.?

yudhendro mahnā varivaś cakāra devebhyaḥ satpatiś carṣaṇiprāḥ / (7.1) Par.?

vivasvataḥ sadane asya tāni viprā ukthebhiḥ kavayo gṛṇanti // (7.2) Par.?

satrāsāhaṃ vareṇyaṃ sahodāṃ sasavāṃsaṃ svar apaś ca devīḥ / (8.1) Par.?

sasāna yaḥ pṛthivīṃ dyām utemām indram madanty anu dhīraṇāsaḥ // (8.2) Par.?

sasānātyāṁ uta sūryaṃ sasānendraḥ sasāna purubhojasaṃ gām / (9.1) Par.?

hiraṇyayam uta bhogaṃ sasāna hatvī dasyūn prāryaṃ varṇam āvat // (9.2) Par.?

indra oṣadhīr asanod ahāni vanaspatīṃr asanod antarikṣam / (10.1) Par.?

bibheda valaṃ nunude vivāco 'thābhavad damitābhikratūnām // (10.2) Par.?

śunaṃ huvema maghavānam indram asmin bhare nṛtamaṃ vājasātau / (11.1) Par.?

śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām // (11.2) Par.?