Texts

Select a text:
Bibliography

Select a chapter:
(no revisions)

Associated topic(s): Rudra

Show parallels Show headlines
Use dependency labeler

Chapter id: 16470

yau hemantaṃ svāpayatho balenārvāg devebhya uta yau paro divaḥ / (1.1) Par.?

bhavārudrayoḥ sumatiṃ vṛṇīmahe 'nyatrāsmad aghaviṣā vy etu // (1.2) Par.?

yo dyām ātanoti yo 'ntarikṣaṃ stabhnāty ojaso jāyamānaḥ / (2.1) Par.?

tasmai rudrāya haviṣā vidhemānyatrāsmad aghaviṣā vy etu // (2.2) Par.?

yayor vadhān nāpapadyate kiṃ canāntar deveṣūta mānuṣeṣu / (3.1) Par.?

tābhyāṃ rudrābhyāṃ haviṣā vidhemānyatrāsmad aghaviṣā vy etu // (3.2) Par.?

yāv īśāte paśūnāṃ pārthivānāṃ catuṣpadām uta vā ye dvipādaḥ / (4.1) Par.?

tābhyāṃ rudrābhyāṃ haviṣā vidhemānyatrāsmad aghaviṣā vy etu // (4.2) Par.?

yasya pratihitāyāḥ saṃ viśanta āraṇyāḥ paśava uta grāmyāsaḥ / (5.1) Par.?

tasmai rudrāya haviṣā vidhemānyatrāsmad aghaviṣā vy etu // (5.2) Par.?

yasmād oṣadhayo barbhriyamāṇā yanti yasmād vṛkṣāso na viyanti viśve / (6.1) Par.?

vayāṃsi yasmāt pracaranti bhīṣā tasmai rudrāya haviṣā vidhemānyatrāsmad aghaviṣā vy etu // (6.2) Par.?

yaḥ parvatān vidadhe 'ti vidvān yo bhūtāni kalpayati prajānan / (7.1) Par.?

tasmai rudrāya haviṣā vidhemānyatrāsmad aghaviṣā vy etu // (7.2) Par.?

yāv īśānau carato dvipado 'sya catuṣpadaḥ / (8.1) Par.?

yā ugrau kṣipradhanvānau tābhyāṃ rudrābhyāṃ haviṣā vidhemānyatrāsmad aghaviṣā vy etu // (8.2) Par.?

punaś cakṣuḥ punaḥ prāṇaṃ punar āyur dhehi no jātavedaḥ / (9.1) Par.?

rudra jalāṣabheṣaja vidvāṃsas ta enā haviṣā vidhemānyatrāsmad aghaviṣā vy etu // (9.2) Par.?

Duration=0.035655975341797 secs.