Texts

Select a text:
Bibliography

Select a chapter:
(no revisions)

Associated topic(s): Soma sacrifice

Show parallels Show headlines
Use dependency labeler

Chapter id: 15804

antaryāmapātreṇa sāvitram āgrayaṇād gṛhṇāti // (1) Par.?

prajāpatir vā eṣa yad āgrayaṇaḥ prajānām prajananāya // (2) Par.?

na sādayati // (3) Par.?

asannāddhi prajāḥ prajāyante // (4) Par.?

nānuvaṣaṭkaroti // (5) Par.?

yad anuvaṣaṭkuryād rudram prajā anvavasṛjet // (6) Par.?

eṣa vai gāyatro devānāṃ yat savitā // (7) Par.?

eṣa gāyatriyai loke gṛhyate yad āgrayaṇaḥ // (8) Par.?

yad antaryāmapātreṇa sāvitram āgrayaṇād gṛhṇāti svād evainaṃ yoner nirgṛhṇāti // (9) Par.?

viśve devās tṛtīyaṃ savanaṃ nodayacchan // (10) Par.?

te savitāram prātaḥsavanabhāgaṃ santaṃ tṛtīyasavanam abhi paryaṇayan // (11) Par.?

tato vai te tṛtīyaṃ savanam udayacchan // (12) Par.?

yat tṛtīyasavane sāvitro gṛhyate tṛtīyasya savanasyodyatyai // (13) Par.?

savitṛpātreṇa vaiśvadevaṃ kalaśād gṛhṇāti // (14) Par.?

vaiśvadevyo vai prajāḥ // (15) Par.?

vaiśvadevaḥ kalaśaḥ // (16) Par.?

savitā prasavānām īśe // (17) Par.?

yat savitṛpātreṇa vaiśvadevaṃ kalaśād gṛhṇāti savitṛprasūta evāsmai prajāḥ prajanayati // (18) Par.?

some somam abhigṛhṇāti // (19) Par.?

reta eva tad dadhāti // (20) Par.?

suśarmāsi supratiṣṭhāna ity āha // (21) Par.?

some hi somam abhigṛhṇāti pratiṣṭhityai // (22) Par.?

etasmin vā api grahe manuṣyebhyo devebhyaḥ pitṛbhyaḥ kriyate // (23) Par.?

suśarmāsi supratiṣṭhāna ity āha // (24) Par.?

manuṣyebhya evaitena karoti // (25) Par.?

bṛhad ity āha // (26) Par.?

devebhya evaitena karoti // (27) Par.?

nama ity āha // (28) Par.?

pitṛbhya evaitena karoti // (29) Par.?

etāvatīr vai devatāḥ // (30) Par.?

tābhya evainaṃ sarvābhyo gṛhṇāti // (31) Par.?

eṣa te yoniḥ // (32) Par.?

viśvebhyas tvā devebhya ity āha // (33) Par.?

vaiśvadevo hy eṣa // (34) Par.?

Duration=0.10357880592346 secs.